Сојузот на синдикатите на Македонија (ССМ) бара работниците заболени од коронавирусот, ковид-19, работниците кои се во изолација или во само изолација поради изложеност на ковид-19, да им биде исплатен надомест на плата за боледување, односно надомест за професионално заболување во висина од 100 проценти.
„Во изминатиот период, сведоци сме дека голем број на работници не по нивна вина, или се заболени од ковид-19, или се во изолација или самоизолација поради контакт со друг работник кој бил изложен на заразната болест, дали на работното место или при превоз до и од работното места и од тие причини потребно е Владата, веднаш преку носење на уредба да го регулира статусот на тие работници и да спречи исплата на плата пониска од 100 проценти како надомест на плата за боледување, односно за време на привремена неспособност за работа“,
се вели во соопштението од ССМ.
Со ваквата уредба, велат од Синдикатот, ќе се спречат сите несовесни работодавачи да ги кршат правата на работниците во тие исклучително сложени и тешки моменти за нив, а со тоа ќе се обезбеди и сигурност на платата и егзистенција на работниците се со цел наминување на таквата состојба.
„Потсетуваме дека обврска на сите нас е да ги зачуваме здрави работниците, бидејќи само здрави работници можат да ја вратат економијата на здрави нозе. Дополнително, укажуваме дека реагиравме на појави во одредени компании кога работодавачите иако добиле субвенции од државата во висина од 14.500 денари по работник за исплата на платата, на работниците им исплаќаат понизок износ на плата од она коешто го добиле како помош, а има и такви компании кои иако земале државна помош воопшто не исплатиле плати на работниците“,
се додава во соопштението.
Управата за јавни приходи, сметаат од Синдикатот, потребно е веднаш да информира кои компании, корисници на финансиската помош, исплатиле плата пониска од 14 500 денари на работниците, поради тоа што на крајот на денот, како што велат, таа државна помош ќе биде враќана преку даноците кои ги плаќаат токму работниците, а во тој случај за нашите пари бараме транспарентност и отчетност. Владата потребно е да го има ова во предвид при продолжување на финансиската поддршка за исплата на плати, порачуваат од ССМ.