Прекинот траел неколку часа, а аеродромот бил повторно отворен во 4:50 часот по локално време
Воздушниот сообраќај на меѓународниот аеродром во Вилнус бил привремено прекинат во текот на ноќта откако во литванскиот воздушен простор беа забележани сомнителни балони. Инцидентот доведе до пренасочување на неколку летови.
Прекинот траел неколку часа, а аеродромот бил повторно отворен во 4:50 часот по локално време, објави операторот на аеродромот.
Портпаролот на операторот на аеродромот за агенцијата БНС изјави дека сообраќајот е прекинат поради „можна низа балони што се движат кон Вилнус“.
Шефот на Националниот центар за управување со кризи (НКВЦ), Вилмантас Виткаускас, за националната телевизија ЛРТ потврди дека се забележани летачки објекти, а по два часа НКВЦ го потврди присуството на 13 балони. Одлуката за затворање на воздушниот простор била донесена поради директна опасност за безбедноста на полетувањето и слетувањето на авионите.
Како резултат на затворањето на воздушниот простор, неколку авиони кои требало да слетаат во главниот град биле пренасочени кон Летонија и Полска или биле вратени назад, додека еден лет за Хелсинки бил откажан.
Овој инцидент доаѓа во време на сè почести нарушувања на воздушниот простор во Европа, особено со употреба на беспилотни летала.
Литванија, членка на НАТО и силен поддржувач на Украина, веќе има искуство со вакви нарушувања. Аеродромот во Вилнус беше затворен двапати претходно, во август и во септември, поради извештаи за забранети летови со беспилотни летала. Како одговор на прекршувањата од дронови кои доаѓаа од соседна Белорусија, Литванија претходно прогласи зона на забрането летање долга 90 километри, паралелна со таа соседна земја, и објави дека тоа ќе им овозможи на нејзините вооружени сили да реагираат на прекршувањата.
Слични инциденти беа регистрирани и во други европски центри, како што е германскиот аеродром во Минхен, кој беше затворен две ноќи по ред минатата недела поради предупредувања за беспилотни летала, како и аеродромите во Копенхаген и во Осло во септември.