Наредната седница на Уставниот суд ќе се одржи на 15 октомври, два дена пред крајот на изборната кампања за првиот круг од локалните избори кои се закажани на 19 октомври
Уставниот суд информира дека на наредната седница ќе биде ставена иницијативата на Левица со која партијата го оспори Упатството за радиодифузерите за локалните избори што Агенцијата за аудио и аудиовизуелни медиумски услуги (ААВМУ) едногласно го усвои на 26 септември.
Седницата на Уставен ќе се одржи на 15 октомври (среда), два дена пред крајот на изборната кампања за првиот круг од локалните избори кои се закажани на 19 октомври.
„Иницијативата на Левица за Упатството ќе биде ставена на следната седница, на 15 октомври“,
информираат денеска од Уставниот суд.
Од Уставниот суд вчера информираа дека е оформен предмет по иницијативата на Левица за Упатството на ААВМУ, според кое, партијата е исклучена од можноста за платено политико рекламирање и покрај тоа што има шест пратеника во Собранието. Иницијативата во петокот ја поднесе претседателот на Левица, Димитар Апасиев, а како што информираа од Судот, таа стигнала до судските служби во понеделникот оваа недела.
Апасиев минатата недела информира дека со иницијативата е поднесено и барање Уставен да донесе времена мерка за стопирање на Упатството на ААВМУ.