Во говорот пред жителите на Демир Капија, Мицкоски рече дека мора да му одговори на лидерот на опозицискиот СДСМ, Венко Филипче, на неговата изјава дека актуелната власт не открила големи кривични случаи и поради тоа нема право да ги обвинува опозициските партии, како СДСМ и Демократската унија за интеграција (ДУИ)
Тоа е така, според премиерот, зашто овие две партии сè уште имаат свои слуги во обвинителството и судството, кои не дозволуваат да се случат големи кривични предмети, иако МВР и другите истражни органи многу темелно сработија десетици случаи на висока корупција кога владееја СДСМ и ДУИ
Зборувајќи за очекувањата и проблемите во Демир Капија, премиерот Христијан Мицкоски денеска во рамки на кампањата за локалните избори од овој град се осврна и на состојбата во судството и обвинителството. Како и вчера од Струга, тој повтори дека по локалните избори ќе се занимава со судството и обвинителството, затоа што мора еднаш засекогаш да се стави крај со овој перманентен бастион на криминалот.
Во говорот пред жителите на Демир Капија, Мицкоски рече дека мора да му одговори на лидерот на опозицискиот Социјалдемократски сојуз (СДСМ), Венко Филипче, за неговата изјава дека актуелната власт не открила големи кривични случаи и поради тоа нема право да ги обвинува опозициските партии, како СДСМ и Демократската унија за интеграција (ДУИ).
„Морам да прокоментирам една изјава на претседателот на СДСМ. Тој кажа дека немам право да ги обвинувам СДСМ и ДУИ за судството и обвинителството, зашто 15 месеци сме биле влада и немало некои големи кривични случаи. Затоа чувствувам потреба да му одговорам. Нема големи кривични случаи само поради една причина, а тоа се малкумина ваши лакеи што сè уште ги има во обвинителството и судството, а кои не дозволуваат да се случат големи кривични предмети, иако истражните органи, како Министерството за внатрешни работи (МВР) и другите, многу темелно сработија десетици случаи на висока корупција кога влада беа СДСМ и ДУИ“,
рече тој.
Според Мицкоски, „нивните лакеи грчевито се борат да се опструираат истрагите поткрепени со докази, за да не можат поранешните функционери во владата на СДСМ и ДУИ, кои ја крчмеа, распродаваа и разнебитуваа Македонија, да одговараат“.
„Но, имам лоша вест. Локалните избори за еден месец ќе завршат и вашите лакеи ќе бидат сменети, а потоа ќе дојдат вистински судии и обвинители и вие ќе одговарате. Обрачот се стега и нема бегање од одговорност. А сите ваши лакеи во обвинителството и судството ќе бидат разрешени и ќе одговараат за попречување на правдата“,
кажа премиерот.
Филипче неколкупати досега посочи дека одговорноста за неспроведување на реформите во правосудството е кај премиерот и неговиот тим, а целта на ВМРО-ДПМНЕ е да го контролира судството.
„Сè што сакаат е да го контролираат судството, да зачуваат свои роднини, пријатели, сопружници на градоначалници, на коалициски партнери, сè со цел да имаат свои луѓе и да може да влијаат на судски процеси. Ништо повеќе не сакаат од тоа. За жал, повторно партизирана држава како во нивниот претходен мандат до 2017 година“,
вели лидерот на СДСМ.