Тој во своето обраќање пред граѓаните на Пробиштип истакна дека постои разлика меѓу СДСМ и ВМРО-ДПМНЕ и оти нивната политика има јасен приоритет, а тоа е крај на договори зад затворени врати и крај на картелите и порача дека ќе се борат за достоинствени плати и фер пензии
Македонија е нашиот заеднички дом во којшто секој граѓанин е еднаков, во кој има место за сите, а не само за привилигираните. Да го одбраниме нашиот заеднички дом, да ја одбраниме Македонија, како дом за сите, не како приватна сопственост на малкумина од власта, порача вечерва претседателот на СДСМ Венко Филипче од Пробиштип, каде што беа промовирани кандидатите за советници и кандидатот за градоначалник за Општина Пробиштип, Драган Анастасов-Ладич.
„Да изградиме општество каде што младите ќе остануваат, а не заминуваат, да создадеме Македонија во која трудот се вреднува, а не партиската книшка. Оваа битка не е само политичка, оваа битка е за праведност, за достоинство, за нашата иднина и токму граѓаните се тие коишто ја носат таа борба. СДСМ од секогаш бил повеќе од партија, бил движење за слобода, за правда, за еднаквост. Нашите корени се во АСНОМ, во генерации коишто ја вградија темелната вредност државата да биде дом на секој човек“,
рече Филипче.
Тој во своето обраќање пред граѓаните на Пробиштип истакна дека постои разлика меѓу СДСМ и ВМРО-ДПМНЕ и оти нивната политика има јасен приоритет, а тоа е крај на договори зад затворени врати и крај на картелите и порача дека ќе се борат за достоинствени плати и фер пензии.
Според Филипче, кандидатот на СДСМ за градоначалник на Пробиштип, ќе ја има победата уште во првиот круг.
„Ладич го трансформираше Пробиштип во модерно, урбано место за живеење. Нашиот Драган Анастасов – Ладич од 2017 година до сега, од дете на социјалдемократската младина до татко на градот, два мандати, осум години. Искрена, упорна, отворена работа, врвен професионалец“,
нагласи лидерот на СДСМ.
Кандидатот за градоначалник за Општина Пробиштип од СДСМ, Драган Анастасов, кој на овие локални избори ја бара довербата од граѓаните за трет градоначалнички мандидат, истакна дека пред граѓаните на Пробиштип не стои само како кандидат за нов мандат, туку како човек кој верува во себе и во нив.
„Раководењето со општината не ме промени, но ме научи на истрајност и упорност. Постојано велев дека работата не е завршена – дури навистина не се заврши, но иако бев свесен, оваа работа ме научи и на тоа дека сите во нашата општина ги делиме истите проблеми и истите предизвици, без разлика на каква било определба. Затоа, акцентот го ставивме директно на граѓаните, вложивме многу во социјалната програма, со низа мерки и проекти наменети да го олеснат секојдневниот живот на нашите сограѓани од социјален ризик, инвестиравме во образованието, детската заштита, инфраструктурата, спортот, младите и културата“,
рече Анастасов.
Тој ја презентираше и програмата за наредните четири години, во која како приориретни проекти за Пробиштип се наведени реконстркција на Градскиот плоштад „Свети Гаврил Лесновски“ со изградба на подземен паркинг простор за 80 возила со цел намалување на метежот и сообраќајниот притисок во срцето на градот, фасадна и покривна реконструкција на постојни згради за колетивно домување, со што ќе се обезбеди енергетска ефикасност, подобри услови за живеење и модерен изглед на објектите.
„Техничка вода за сите индустриски капацитети и алтернативни системи за водоснабдување во руралните средини – со овој проект ја зачувуваме водата за пиење, ги снабдуваме индустриските капацитетии со техничката вода, а со тоа им овозможување огромни заштеди и со алтернативното водоснабдување во сите рурални средини ќе го надминеме проблемот во летнитниот период од годината кога имаме значајно зголемени потреби. Детската градинка во населба Пробиштип станува реалност – преадаптација и целосно опремување на простор во подрачното основно училиште „Ванчо Трајков“, што ќе значи нова градинка за 40 деца поблиску до нивните домови“,
посочи Анастасов.
Пред граѓаните на Пробиштип вечерва се обрати и носителката на листата за советници за Општина Пробиштип од СДСМ, Весна Ристовска.