Според неа, издавачките куќи имаат право 10 отсто од учебниците да ги пуштат во слободна продажба по истата цена утврдена со закон по која ги откупило и Министерството за образование и наука (МОН)
Факт е дека дел од училиштата не го нарачаа соодветниот број учебници. Сега казната за нив е што треба да ги отпечатат учебниците и да им ги дадат на родителите, рече вечерва министерката за образование Весна Јаневска во гостување на емисијата „Вин-вин“ на ТВ Телма.
„Видовме дека процесот оди бавно и тешко. На училиштата им рековме да нарачаат учебници, но сепак дел од нив не го нарачаа потребниот број“,
кажа таа.
Според неа, некои родители и самите го прават тоа и не ги чекаат училиштата да им ги испечатат учебниците.
Посочи и дека издавачките куќи имаат право 10 отсто од учебниците да ги пуштат во слободна продажба по истата цена утврдена со закон по која ги откупило Министерството за образование и наука (МОН).
Опозицискиот СДСМ пред два дена ги обвини актуелната власт и Министерството за образование и наука (МОН) за неисполнување на ветувањето за навремена испорака на учебници.
Според партијата, родителите не се должни да печатат материјали ниту, пак, наставниците да импровизираат. Оттаму додаваат и дека министерката за образование и наука Весна Јаневска прво зборуваше за решавање на проблемот преку донации, за потоа да им порача на учениците и родителите да користат пдф-учебници достапни на интернет.
Од ВМРО-ДПМНЕ го повикаа СДСМ да наведе кој конкретен учебник, според нив, недостига. Од владејачката партија тврдат дека наставата се одвива во најдобар ред и додаваат дека во текот на седумгодишното владеење на СДСМ учениците немале учебници.