„Делуваме во женска солидарност за да повикаме на одговорност и промена – законска, институционална и општествена, за ниту една повеќе да не биде жртва“, напишаа од ова движење на социјалната мрежа Инстаграм
По минатонеделниот протест, движењето „Ниту една повеќе“ за утре (25 септември) во 18 часот повикува на блокада на раскрсницата кај паркот „Жена борец“ во Скопје, со цел граѓаните да се вклучат во заедничка борба против насилството врз жените.
По убиството на 31-годишната велешанка Росица Коцева, што се случи на 15 септември, а беше извршено од страна на нејзиниот поранешен партнер, кој подоцна се самоуби, неколку невладини организации повикаа на протест пред Министерството за внатрешни работи и блокада кај паркот „Жена борец“ во Скопје, поради колективниот крах на системот кој дозволува да се случува континуирано насилство врз жени, што, пак, доведува до фемициди.
„Време е за организирано и здружено делување. Преку размена во јавен простор да го канализираме нашиот колективен гнев и заедно да дискутираме за решенија наспроти институциите што ги загрозуваат нашите улици. Дојдете на улица и придружете се во заедничката борба против насилството врз жените и културата на насилство“,
напишаа од „Ниту една повеќе“ на социјалната мрежа Инстаграм.
Претходно од „Ниту една повеќе“ информираа дека го почнуваат ова движење зашто насилството врз жените и фемицидот не се поединечни инциденти, туку се последица на неказнивост и култура која повикува и оправдува насилство.
„Делуваме во женска солидарност за да повикаме на одговорност и промена – законска, институционална и општествена, за ниту една повеќе да не биде жртва“,
велат од движењето.
Во описот на „Ниту една повеќе“ пишува дека е феминистичко движење за слобода и правда за жените, кое се залага за еднаквост и за живот без насилство.
„Не прифаќаме жените да бидат гледани само низ улогите што системот ги наметнува, туку се бориме за свет во кој достоинството, гласот на животот на секоја жена има вредност. Ова е место на сила, бунт и надеж. Придружете ни се“,
напишаа на социјалните мрежи.
- По убиството на Росица, за утре најавен протест пред МВР: „Ниту една повеќе“
- (ФОТО+ВИДЕО) Одговорност од полицајци, обвинители и судии – побараа присутните на протестот пред МВР за убиството на Росица
- (ФОТО) Фемицидот не е несреќа, туку системска криза – порачаа активистите на протестот кај паркот „Жена борец“