ДИК планира средства за печатење на избирачкиот материјал како во сите општини да ќе има втор круг, но претседателот Борис Кондарко не очекува за оваа намена да се потрошат повеќе пари од претходните избори
Државната изборна комисија (ДИК) ја продолжува соработката со печатницата „Киро Дандаро“ од Битола за печатење на гласачките ливчиња.
Во пресрет на локалните избори, претседателот на ДИК, Борис Кондарко, вели дека склучиле рамковна спогодба во висина од околу 48 милиони денари (околу 800 илјади евра) за „изработка и печатење на доверлив и недоверлив изборен материјал и избирачки список“.
„Рамковната спогодба е до 48 милиони денари. Меѓутоа, тоа зависи од тоа во колку општини ќе има втор круг и во зависност од таквите трошоци, ќе се димензионира. Проектирано е како секаде да ќе има втор круг, но претпоставуваме дека тоа не е логично, така што, овие трошоци би биле нешто пониски од проектираното и би се движеле негде во рамките на минатите изборни циклуси, можеби и малку помалку од тоа“,
вели Кондарко.
Првиот човек на ДИК вели дека и покрај буџетското проектирање и планирање, секогаш кога има избори, Министерството за финансии одобрува помала сума.
Кондарко: Не е тајна дека кога кога нема избори, кога не е изборна година, Државната изборна комисија практично нема никакви средства освен за тековното работење. Кога ќе дојдат избори, имаме посебен буџет, имаме доволно средства да ги спроведеме изборите, меѓутоа, тие се секогаш помали од проектираните и планираните. Без разлика кој бил во Министерството за финансии, тоа правило продолжува и во минатото и сега.
360֯: А, зошто е така и како имате доволно ако се помалку од проектираните?
Кондарко: Имаме доволно средства – да, со правилна распределба, односно прераспределба, или и откажување од некои, условно речено, помалку приоритетни работи, да ги пренасочиме, лоцираме на поприоритетните работи и, како знаеме и умееме, да се снајдеме со тие средства.
360֯: Недомаќински проектирате?!
Кондарко: Не, домаќински проектираме и домаќински се однесуваме при трошењето и ќе гледаме овие доделени средства да ги испланираме на соодветен начин да стигнат за сите потреби.
Вкупниот буџет на ДИК за претстојните избори е околу 10 милиони евра. Кондарко вели дека повеќе од две третини од овие пари се предвидени за платено политичко рекламирање, а помалку од една третина е за сите други изборни дејствија.