Во последните 24 часа, пожарникарите успешно изгаснале 28 пожари низ целата земја
Изминатото деноноќие, до 7 часот утринава, на територијата на земјата биле регистрирани вкупно 34 пожари на отворено. Од нив, дури 28 се целосно изгаснати, додека два сè уште се активни, а четири се под контрола.
Едниот активен пожар е на планината Кожуф кај селото Петрово, Општина Гевгелија, каде гори букова шума. Вториот е на планината Добра Вода во општина Македонски Брод, каде што гори ниска вегетација.
Од Центарот за управување со кризи (ЦУК) велат дека четири пожари се ставени под контрола. Два пожари се во Општина Гази Баба, во селото Трубарево, каде повеќе од една недела гори електричен отпад, и во селото Виниче, каде гори нискостеблеста шума.
Еден пожар под контрола има во Општина Студеничани, кај селото Батинци, каде горат ниска вегетација и мешана шума. Под контрола, велат од ЦУК, е и пожарот на депонијата во селото Бали, Општина Кочани.
Во последните 24 часа, пожарникарите успешно изгаснале 28 пожари низ целата земја. Тие интервенирале во различни општини каде гаснеле пожари на депонии, во шуми и на стрништа.