Државите што ја признаваат палестинската држава, според него, всушност ги наградуваат терористичките акции на Хамас против Израел
Израелскиот премиер Бенјамин Нетанјаху изјави дека создавањето палестинска држава го загрозува постоењето на Израел. Оваа негова изјава доаѓа по одлуката за формално признавање на Палестина од страна на Обединетото Кралство, Австралија и Канада.
Посочи дека Израел решително ќе се спротивстави на меѓународните иницијативи за формирање палестинска држава, нагласувајќи дека против овие процеси ќе се бори и пред Генералното собрание на Обединетите нации (ОН).
„Треба да се бориме во ОН и на сите други арени против лажната пропаганда против нас и против повикот за создавање палестинска држава што би го загрозило нашето постоење и би претставувало апсурдна награда за тероризмот“,
кажа тој.
Според него, државите што ја признаваат палестинската држава, всушност ги наградуваат терористичките акции на Хамас против Израел.
Потсети дека ќе се сретне со американскиот претседател Доналд Трамп по неговиот говор во ОН.
„Меѓународната заедница ќе слушне за ова во наредните денови. По Генералното собрание на ОН, ќе се сретнам со мојот пријател, претседателот Трамп. Ова ќе биде четврти пат како се среќавам со него од почетокот на неговиот втор мандат. И имаме многу за разговор“,
рече израелскиот премиер.
Израелското Министеерство за надворешни работи соопшти дека признавањето на палестинската држава е награда за џихадистичкиот Хамас.
„Самите лидери на Хамас отворено кажуваат деека ова признавање е директен резултат и плод на масакрот од 7 октомври. Не дозволувајте џихадистичката идеологија да ви ја диктира политиката“,
соопштија од Министерството, без експлицитно да ги именува земјите што објавија признавање на палестинската држава.
Обединетото Кралство, Австралија и Канада денеска објавија дека формално ја признаваат Палестина како суверена држава.
Повеќе од 140 земји веќе презедоа чекори за признавање на палестинска држава, а одлуките на Франција и Велика Британија се особено важни, бидејќи земјите се членки на Групата седум (Г7) и Советот за безбедност на ОН.