Според претседателот на ССК, бизнис заедницата не се согласува со замрзнување на маржите вели оти цените треба да се формираат пазарно
Цената на лебот нема да се зголеми, соопшти денеска претседателот на Сојузот на стопански комори (ССК), Горан Ѓорѓиевски. Тој истакна дека цената на пченицата е стабилна, а нема да има големи промени ниту во цената на суровото сончогледово масло.
Одговарајќи на новинарски прашања за евентуални нови мерки на Владата, Ѓорѓиевски нагласи дека бизнис заедницата не се согласува со замрзнување на маржите.
Според него, цените треба да се формираат пазарно, со доследно применување на Законот за нефер трговски практики.
Претседателот на ССК се осврна и на прашањето за минималната плата, нагласувајќи дека мора да се одржи баланс при нејзиното зголемување, бидејќи тоа влијае и на зголемување на сите останати плати.
„Проблем не е бизнисот, туку администрацијата. Треба да научиме дека треба да работиме за да земаме плата. Треба да креираме ситуација на работење во општеството“,
изјави Ѓорѓиевски.
Тој додаде дека квалитетните работници во приватниот сектор добиваат одлични плати, а оние што не се задоволни, си заминуваат.