„Ова не е само објект, ова е инвестиција во културата. Ова е идентитетот и иднината на Скопје. Универзална сала ќе биде симболот на модерно Скопје“, кажа министерот за култура
Новата Универзална сала ќе ја задржи постоечката форма со цел почитување на колективната меморија, ќе располага со капацитет од 1 200 седишта, а ќе има и нова просторна акустика со современи техничко-технолошки системи. Ова на денешната прес-конференција го соопшти министерот за култура Зоран Љутков по презентација на визуелното решение на проектот за култниот објект за скопјани.
Визуелното решение на новата Универзална сала / Фото: Министерство за култура
„Ова ќе биде модерен и функционален објект што ќе го врати значењето на оваа култна локација и ќе ѝ даде нова енергија на културната сцена во Скопје. Универзалната сала ќе стане симбол на културна размена, креативност и заедништво, достапна за сите граѓани“,
кажа тој.
Проектот предвидува нова просторна акустика, со вклучени техничко-технолошки системи, со нова сценска техника, ЛЕД-осветлување, аудио-видео и електрични инсталации, како и современи материјали во ентериерот и екстериерот.
Планирано е и енергетски ефикасно решение, како и ново партерно и хортикултурно решение.
„Очекувам Универзална сала да почне да се гради на почетокот на октомври, како и да завршат и постапките за избор на изведувач и на надзор, со што ќе се создадат услови за отпочнување на изградба по принципот – клуч на рака. Планирано е изградбата да заврши најдоцна до крајот на 2027 година, со што во 2028 година ќе бидеме подготвени да ја започнеме реализацијата на програмата за проектот ‘Скопје – Европска престолнина на културата’“,
вели министерот за култура.
Инвестицијата се проценува на 20 милиони евра.
„Ова не е само објект, ова е инвестиција во културата. Ова е идентитетот и иднината на Скопје. Универзална сала ќе биде симболот на модерно Скопје“,
рече Љутков.
Проектантот Бујар Муча вели оти во проектот е задржан концептот на гледалиштето и влезовите, но бројот на редови е намален поради поголем комфор и безбедност. Таа ќе може да биде домаќин и на филмски премиери, а подобрената акустика нема да им пречи на жителите во околината.
„Со 1 200 седишта наместо 1 500, салата ќе биде пофункционална и ќе ги исполнува сите безбедносни стандарди“,
кажа тој.
По завршување на проектот, објектот повторно ќе премине под надлежност на Град Скопје.
Во Универзалната сала избувна пожар во април минатата година, само еден месец откако продолжија градежните работи за нејзина реконструкција.
Почна да се реновира на крајот на мандатот на поранешниот градоначалник на Град Скопје, Петре Шилегов.
Со доаѓањето на сегашната градоначалничка на Скопје, Данела Арсовска, работите се стопираа за околу две години.
Потоа, со одлука на Владата, додека министерка за култура беше Бисера Костадиновска-Стојчевска, ресорното министерство ја презеде салата од Град Скопје и се продолжи со реконструкцијата, која потоа беше стопирана од пожарот.
