Францускиот претседател Емануел Макрон сега се соочува со избор помеѓу свикување предвремени избори или избор на петти премиер за помалку од две години
Францускиот парламент денеска ѝ изгласа недоверба на владата предводена од Франсоа Бајру, кој е на премиерската функција само девет месеци. На гласањето за доверба на владата, кое го побара самиот Бајру, француското национално собрание гласаше со 364 гласа „за“, 194 „против“ и 25 „воздржани“.
Бајру побара гласање за доверба на владата во обид да добие парламентарна поддршка за неговата стратегија за намалување на националниот долг што е речиси двојно поголем од горната граница од три проценти на ЕУ и да започне со решавање на долгот што порасна на 114 проценти од бруто домашниот производ.
„Имате моќ да ја соборите владата, но немате моќ да ја избришете реалноста – таа ќе остане немилосрдна: трошоците ќе продолжат да растат, а долгот, кој веќе е неподнослив, ќе се зголеми“,
изјави Бајру во парламентот пред гласањето за доверба, додавајќи дека во прашање е опстанокот на Франција.
По гласањето недоверба на владата на Франција, се очекува Бајру да поднесе оставка утре, а во наредните денови францускиот претседател Емануел Макрон да именува нов премиер. Тој сега се соочува со избор помеѓу свикување предвремени парламентарни избори или избор на петти премиер за помалку од две години.