Од Основното јавно обвинителство велат оти обвинетиот ќе се гони за кривичното дело насилство
Обвинителството поднесе обвинение за лицето што на 24 август влезе на теренот за време на фудбалскиот натпревар помеѓу младинските тимови на ФК Шкупи и ФК Брегалница во Штип, при што нападна и повреди две петнаесетгодишни деца, играчи на ФК Брегалница.
Според соопштението на Основното јавно обвинителство, поднесен е обвинителен предлог против едно лице за сторено кривично дело насилство од член 386, став 4 во врска со став 3 и став 1 од Кривичниот законик. Оттаму велат дека на 24 август, на стадионот „Бело Брдо“ во Штип за време на фудбалскиот натпревар помеѓу младински екипи на Брегалница од Штип и Шкупи од Скопје, обвинетиот со грубо насилство ја загрозил сигурноста на оштетените, две петнаесетгодишни деца кои биле играчи на домашниот тим. Тој им нанел телесни повреди на децата, а кај нив и кај присутната публика, велат од Обвинителството, предизвикал чувство на несигурност, загрозување и страв.
„Настанот се случил во 89-тата минута од натпреварот, која судијата поради прекршок доделил втор жолт картон со што го исклучил од игра синот на обвинетиот, кој играл за Шкупи. Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на Брегалница. Тогаш на теренот влегол таткото и со тупаници и клоци започнал да ги удира двете деца нанесувајќи им телесни повреди. На игралиштето влегле и други лица од публиката, кои спречиле натамошна ескалација на настанот“,
велат од Обвинителството.
Јавниот обвинител до Основниот суд во Штип доставил и предлог за продолжување на претходно определената мерка притвор за обвинетиот.
За инцидентот што се случи минатата сабота на стадионот „Бело Брдо“ во Штип претходно од штипскиот Основен суд информираа дека на 43-годишниот родител, кој за време за натпреварот влезе на теренот и физички нападна двајца малолетни играчи, определен му е осумдневен притвор.