Таа истакна дека мора да се обезбеди „праведен и траен мир за Украина со цврсти и веродостојни безбедносни гаранции што ќе ја претворат земјата во челичен еж“
Зеленски потврди дека со Фон дер Лајен разговарале за дипломатските напори за ставање крај на руската агресија и за гарантирање на безбедноста на украинскиот народ
ФОТО: EPA/OLIVIER HOSLET
По масовниот руски напад на Киев, претседателката на Европската комисија, Урсула фон дер Лајен, разговарала со украинскиот претседател Володимир Зеленски и со американскиот Доналд Трамп.
Во објава на својот профил на социјалната мрежа Икс, Фон дер Лајен вели дека Путин мора да седне на преговарачка маса.
Таа истакна дека мора да се обезбеди „праведен и траен мир за Украина со цврсти и веродостојни безбедносни гаранции што ќе ја претворат земјата во челичен еж“.
„Европа целосно ќе ја одигра својата улога. Нашиот одбранбен инструмент SAFE, на пример, ќе биде важен за зајакнување на храбрите украински вооружени сили“,
додава Фон дер Лајен во објавата.
Just spoke with President @ZelenskyyUa, then @POTUS Donald Trump, following the massive strike on Kyiv which also hit our EU offices.
— Ursula von der Leyen (@vonderleyen) August 28, 2025
Putin must come to the negotiating table.
We must secure a just and lasting peace for Ukraine with firm and credible security guarantees that…
По разговорот со претседателката на Европската комисија, украинскиот претседател Зеленски изрази благодарност за солидарноста по нападите и истакна дека Русија мора да преземе вистински чекори кон мир, во спротивно, притисокот врз неа мора да се интензивира.
„Синоќа беше еден од најголемите напади врз Украина. Русите го избраа Киев како нивна главна цел. Операцијата за пребарување и спасување сè уште е во тек. Благодарни сме на сите што сега стојат со Украина и не молчат“,
пишува Зеленски на неговиот профил на Икс.
Зеленски потврди дека со Фон дер Лајен разговарале за дипломатските напори за ставање крај на руската агресија и за гарантирање на безбедноста на украинскиот народ.
„Се работи многу на различни нивоа токму за оваа цел. Но, сè додека Русија не преземе вистински чекори кон мир, притисокот врз неа мора да се интензивира“,
додава тој.
I spoke with President of the European Commission @vonderleyen.
— Volodymyr Zelenskyy / Володимир Зеленський (@ZelenskyyUa) August 28, 2025
I am grateful for the condolences and solidarity with our people following such a cynical and brutal Russian strike. Last night was one of the largest attacks on Ukraine. The Russians chose Kyiv as their main… pic.twitter.com/Fv34heP2gl
Зеленски додаде дека во текот на разговорот, Фон дер Лајен го информирала за подготовката на 19-тиот пакет санкции на ЕУ против Русија.
„Разговаравме и за нашиот пат на европска интеграција и истовременото отворање на преговарачкиот кластер за Украина и Молдавија. Очекуваме позитивна одлука во блиска иднина“,
пишува украинскиот претседател.
Во последните руски напади врз Киев убиени се најмалку 15 лица, а 48 се здобиле со тешки или лесни повреди. Во нападите оштетени се зградата во кои се наоѓаат канцелариите на Делегацијата на Европската Унија и на Британскиот совет.
Според украинските воздухопловни сили, Русија испалила 598 дронови и 31 балистичка и крстосувачка ракета. Рускиот напад оштетил и енергетски објекти во неколку украински региони, предизвикувајќи локални прекини на електричната енергија.