Со незголемувањето на минималната плата и неприфаќање на предлогот, директно оштетуваат 167 илјади работници во државата кои според УЈП се со примања под 30 илјади денари, вели Трендафилов
Борбата за зголемување на минималната плата, не е борба против Владата или за затворање на компаниите, туку е борба за егзистенција за работниците, вели претседателот на Сојузот на синдикати на Македонија Слободан Трендафилов. Во интервју за Канал 5, Трендафилов вели дека загрижува тоа што се уште нема договор за зголемување на минималната плата.
„Ако имате 510 илјади работници во државата, наспроти 60 илјади работодавачи, кои патем не сите имаат проблем со исплаќање на платата на работниците. Од таа гледна точка, сметаме дека со незголемувањето на минималната плата и неприфаќање на предлогот, директно оштетуваат 167 илјади работници во државата кои според УЈП се со примања под 30 илјади денари. Тоа е огромна бројка, една третина од вкупниот број работници во државата,“
вели Трендафилов.
Последното зголемување на минималната плата во 2022 година, нагласува Трендафилов, е извојувано на улица и во име на ССМ порачува – „не нѐ буткајте на улица, дајте да седнеме да се договориме“.
„Но, кога немате апсолутно никакво разбирање од спротивната страна, кога едните велат „договорете се вие со работодавачите“, а работодавачите ви велат „како да се договориме ние со вас“ – тоа е еден круг што е на штета на 167 илјади вработени во државата,“
вели првиот човек на ССМ.
Меѓу аргументите, Трендафилов ја посочи синдикалната кошница, која според пресметките на ССМ не може да се покрие со две минимални плати. Делот за храна и пијалаци за едно четиричлено домаќинство, додава тој, е еднаков на една минимална плата, и посочува дека минималната плата во Србија од октомври ќе изнесува 500 евра, во Црна Гора е 600 со 800 евра, додека во Босна и Херцеговина 511 евра.
Трендафилов ги искритикува и пратениците , бидејќи според него доколку тие навистина се грижат за работниците, може уште веднаш да донесат измени и дополнувања на Законот за минимална плата и тоа да се применува по завршување на локалните избори.
„Од почетокот на годината до сега сме одржале 14 протести и два штрајка исклучиво за плати, не сме имуни на огранизирање на нови протести и штрајкови, тоа сме им го кажувале на сите власти до сега, и на претходната и на оваа влада, но се надеваме дека ќе наидеме на разбирање и преку дијалог ќе дојдеме до повисоки плати,“
рече Трендафилов.
Трендафилов ги повика на поддршка сите синдикати и работодавачи и посочи дека не треба 509 илјади работници во државата да очекуваат дека 63 илјади членови на ССМ сами да се справат со Владата и со работодавачите.
„Ако продолжат да не туркаат на улица , ние ќе излеземе на улица, но работниците мора да разберат дека не може само три, пет или седум илјади луѓе колку што бевме на последниот протест за 1 мај да извојуваат зголемување на минималната плата“,
посочи тој.