Бабата, кој имала 87 години, додека одмарала во една од собите, осомничената влегла, ја заклучила вратата. Потоа седнала врз бабата и и ставила перница врз главата со намера да ја задуши
Против 28-годишна жена од Скопје Основното јавно обвинителство Скопје спроведува истражна постапка.
Жената како што велат од Обвинителството е осомничена за кривично дело убиство од член 123 (во обид) од Кривичниот законик.
Во описот на случајот од Обвинителството велат дека таа во петокот во домот на улицата „Борис Бојаџиски“, при вршење семејно насилство, се обидела да ја лиши од живот бабата на својот сопруг со која живееле во семејна заедница.
Бабата, кој имала 87 години, додека одмарала во една од собите, осомничената влегла, ја заклучила вратата. Потоа седнала врз бабата и и ставила перница врз главата со намера да ја задуши.
„Ја притискала со перницата и ја удирала со тупаници по главата. Престанала кога мислела дека ја убила и за тоа му кажала на сопругот. Тој веднаш повикал полиција, а оштетената била пренесена во болница каде и биле констатирани нагмечување на главата и на вилицата, како и хематоми“,
додаваат од Обвинителството.
Од Обвинителството велат дека поради тоа што постојат очигледни околности кои укажуваат на можност да го повтори делото, односно да го доврши обиденото дело, до судија на претходна постапка од скопскиот Кривичен суд е доставен предлог за определување мерка притвор за осомничената.
За случајот вчера информираа и од Министерството за внатрешни работи (МВР) од каде рекоа дека во петокот во 14 часот во Скопје, на подрачјето на Ѓорче Петров, полициски екипи ја лишиле од слобода 28-годишната Е.В. од Скопје по претходна пријава дека во домот физички ја нападнала 87-годишната баба на нејзиниот сопруг.