Ниту после 15 јуни Италија нема да дозволи државјаните од земјите што не се членки на ЕУ да влезат во земјата, најави денеска шефот на италијанската дипломатија Луиџи ди Мајо.
„Наша обврска е да ги заштитиме животите и здравјето на нашиот народ“,
рече Ди Мајо во интервју за телевизијата „Рете4“.
Но, истовремено Ди Мајо реагираше на одлуката на Австрија вчера да дозволи влез за граѓаните на сите соседни земји освен на Италија и изрази надеж дека ќе може да ја убеди Виена да ги отвори своите граници за неговата земја.
„Австрија не е загрижена за Италија, туку само за одредени региони. Ние со факти ќе се бориме против оваа загриженост“,
рече тој.
Ди Мајо денеска е во посета на Берлин на средба со германскиот министер за надворешни работи Хајко Мас, за да се осигура дека на 15 јуни ќе почне слободен проток на граѓаните во ЕУ.