Во одговорот на индиското Министерство за надворешни работи се вели дека Њу Делхи веќе јасно го искажал својот став за увозот од Русија и повторил дека царината е „неправедна, неоправдана и неразумна“
Американскиот претседател Доналд Трамп денеска воведе дополнителна царина од 25 отсто за индиските производи, како одговор на континуираниот увоз на руска нафта од страна на Њу Делхи.
Новиот данок на увоз, кој стапува во сила 21 ден по 7 август, ќе ги зголеми царините за некои индиски производи до 50 отсто.
Ројтерс, повикувајќи се на аналитичари, пишува оти тие сметаат дека ова е најсериозното нарушување на односите меѓу САД и Индија откако Трамп се врати на функцијата во јануари.
„Царините се закануваат да го загрозат пристапот на Индија до нејзиниот најголем извозен пазар, каде што пратките во 2024 година изнесуваа речиси 87 милијарди долари. Погодени ќе бидат сектори како текстил, обувки, скапоцени камења и накит“,
пишува Ројтерс.
Ваквата одлука, индиското Министерство за надворешни работи ја нарече „крајно несреќна“, истакнувајќи дека многу други земји увезуваат руска нафта поради својот национален економски интерес.
Во одговорот на индиското Министерство за надворешни работи се вели дека Њу Делхи веќе јасно го искажал својот став за увозот од Русија и повторил дека царината е „неправедна, неоправдана и неразумна“.
„Затоа е исклучително жално што САД одлучија да воведат дополнителни царини за Индија како одговор на активностите што неколку други земји ги преземаат во свој национален интерес“,
се вели во соопштението.
Во соопштението се додава дека Индија ќе ги преземе „сите потребни чекори за да ги заштити своите национални интереси“.
„Индија ќе преземе сите потребни чекори за да ги заштити своите национални интереси“,
се вели во соопштението додавајќи дека купувањата се водени од пазарните фактори и енергетските потреби на 1,4 милијарди луѓе во Индија.