Мицкоски, придружуван од вицепремиерот Изет Меџити, како и министерката за образование Весна Јаневска, положи цвеќе на споменикот на претседателот на Крушевската Република, Никола Карев, пред зградата на Собранието, на споменикот на АСНОМ во паркот „Жена борец“ и на споменикот на првиот претседател на Президиумот на АСНОМ, Методија Андонов-Ченто на плоштадот „Македонија“
Премиерот Христијан Мицкоски денеска од Скопје го честита Илинден со пораки за заедништво и просперитет.
„Овој ден нека нè посетува на жртвата којашто генерациите ја оставиле, за да може нашата генерација да го има ова што денеска го имаме, а тоа е слободна, независна држава Македонија. Нека нивната жртва нè потсетува каква држава треба ние да оставиме на генерациите после нас. Држава во којаштo ќе имаме среќни граѓани, која ќе биде просперитетна и ќе биде татковина на сите – без разлика на етничката припадност. Ова е ден на обединување, да го чествуваме достоинствено и напомош нека ни е Свети Илија“,
кажа премиерот.
Тој не дозволи новинарски прашања по неговото излагање.
Мицкоски, придружуван од вицепремиерот Изет Меџити, како и министерката за образование Весна Јаневска, положи цвеќе на споменикот на претседателот на Крушевската Република, Никола Карев, пред зградата на Собранието, на споменикот на АСНОМ во паркот „Жена борец“ и на споменикот на првиот претседател на Президиумот на АСНОМ, Методија Андонов-Ченто на плоштадот „Македонија“.
Најавено е и дека Мицкоски како партиски лидер ќе предводи делегација на ВМРО-ДПМНЕ во Ташмаруништа, каде што ќе положи цвеќе заедно со претседателот на ОК на ВМРО-ДПМНЕ Струга и заменик-министер за правда Ален Деребан и пратеникот Јован Јаулески.
Инаку, централната манифестација по повод Илинден ќе биде на Мечкин Камен во Крушево, а положување цвеќе ќе има на повеќе локации низ државата.
Во Крушево одбележувањето ќе почне со положување цвеќе на гробот на Никола Карев и на споменикот на хероите на месноста Слива, по што ќе се одржи панихида во храмот „Св. Никола“.
Претседателката Гордана Сиљановска-Давкова ќе положи цвеќе и на Мечкин Камен, каде што ќе има и свое обраќање.
Почетокот на Илинденското востание го објавиле камбаните во Крушево на полноќ спроти Илинден 1903 година. Околу 800 востаници го ослободиле градот, а по два дена Никола Карев ја прогласил Крушевската Република и станал нејзин претседател. Слободната Република траела десет дена.
ПОВЕЌЕ НА ОВАА ТЕМА: