Најголемиот број напади се случиле во источна Украина и за време на руските напади врз областа Никопол во регионот Дњепропетровск. Употребата на такво оружје ја крши Конвенцијата за хемиско оружје од 1993 година, чиј потписник е и Русија
Безбедносната служба на Украина (СБУ) достави докази до Хаг со кои се документираат повеќе од 10 000 случаи за наводна употреба на забранети хемиски агенси од страна на руските сили против украинските војници од почетокот на инвазијата во 2022 година, објави „Киев пост“.
Според СБУ, Русија користела забрането хемиско оружје повеќе од 10 000 пати од почетокот на целосната инвазија. Доказите се доставени до меѓународните обвинители во Хаг и до Организацијата за забрана на хемиско оружје (ОПЦВ) за лабораториска анализа, што претставува најсеопфатен случај што Украина го презентирала досега во својот обид да ја повика Русија на одговорност за хемиски воени злосторства.
СБУ вели дека руските сили редовно користеле аеросолни гранати CS (хлоробензилиден малононитрил) и CN (хлороацетофенон), како и ампули што содржат токсичен хлоропикрин. Овие хемикалии често се испуштаат од беспилотни летала ФПВ за да ги принудат украинските бранители да излезат од ровови или бункери, изложувајќи ги на конвенционален оган.
Најголемиот број напади се случиле во источна Украина и за време на руските напади врз областа Никопол во регионот Дњепропетровск. Употребата на такво оружје ја крши Конвенцијата за хемиско оружје од 1993 година, чиј потписник е и Русија.
ОПЦВ веќе објави три одделни извештаи со кои се потврдува употребата на токсични хемиски агенси од страна на Русија во Украина, иако Русија сè уште има место во Извршниот совет на ОПЦВ.
Европскиот совет одговори со воведување санкции врз неколку руски воени единици и институции поврзани со развојот и употребата на такво оружје. Меѓу нив се руските радиолошки, хемиски и биолошки одбранбени сили, 27. научен центар и 33. Централен институт за истражување и тестирање на руското Министерство за одбрана.
Украина, исто така, отвори домашна истрага за воени злосторства согласно член 438 од Кривичниот законик, а холандските разузнавачки служби јавно потврдија во јули дека Русија спроведува голема и систематска употреба на хемиско оружје, вклучувајќи хлоропикрин и импровизирани гасни бомби.
Холандските власти предупредија дека оваа практика станува нормализирана и побараа Русија да биде исклучена од Извршниот совет на ОПЦВ.
Украинските власти продолжуваат да соработуваат со меѓународните институции за да ги изведат одговорните за нелегалните хемиски напади пред лицето на правдата.