На бродот „Хандала“ има 19 активисти од различни националности, вклучувајќи двајца пратеници од француската радикална левичарска партија Бунтовничка Франција, Габриел Катала и Ема Фурауд, како и двајца новинари
Пропалестинското движење „Флота на слободата“ денеска објави дека нивни брод што носи хуманитарна помош за Газа се приближува кон бреговите на палестинската енклава со намера да се закотви таму утре наутро, и покрај блокадата што ја воведе Израел.
На бродот „Хандала“ има 19 активисти од различни националности, вклучувајќи двајца пратеници од француската радикална левичарска партија Бунтовничка Франција, Габриел Катала и Ема Фурауд, како и двајца новинари. Бродот го напушти пристаништето Сиракуза, Сицилија, на 13 јули.
Израелските поморски сили објавија дека нема да дозволат бродот да стигне до окупираната палестинска територија.
Бродот транспортира медицински потрошен материјал, прехранбени производи, опрема за деца, како и лекови.
Експедицијата има за цел да ја пробие израелската блокада наметната врз Газа од почетокот на конфликтот меѓу Израел и Хамас на 7 октомври 2023 година.