Граѓаните не треба да аплицираат за платежна картичка, туку ќе треба само да проверат на листата дали ги исполнуваат условите за да ја добијат платежната картичка за купување домашни продукти.
Како што информира Владата, УЈП, МОН, ФЗО изготвуваат листа на сите граѓани и вработени со низок доход, листа од сите ученици и студенти и листа на сите здравствени работници, кои ги исполнуваат условите за да добијат домашна платежна картичка.
„Корисниците ќе ја добијат домашната платежна картичка на домашна адреса или ќе можат да ја подигнат од банката издавач, без да аплицираат. Наскоро, на страницата www.kupuvamdomasno.gov.mk, граѓаните ќе може да проверат дали им следува, односно дали се корисници на некоја од платежните картички и која е нивната банка издавач. Корисниците ќе бидат исконтактирани од банките. Целиот процес е направен да биде максимално едноставен за корисниците, без пријавување или аплицирање, туку институциите да ја завршат целата постапка за нив“,
се вели во соопштението.
Корисници на домашни картички се приматели на социјална помош и невработени евидентирани како активни баратели на работа во АВРСМ до 22.5.2020, кои оствариле нето доход до 180.000 ден во 2019 и нето доход до 60.000 денари во период од јануари до април 2020 година, согласно евиденцијата на УЈП. Тие ќе добијат картичка со 9.000 денари.
Потоа, лица кои се во работен однос и кои за периодот од јануари до април 2020 година, оствариле доход само по основ на плата и надоместоци на плата во нето износ не поголем од 60 000 денари на ниво на полно работно време, според евиденцијата на УЈП. Овие корисници ќе добијат картичка со 3.000 денари.
Младите лица со наполнети 16 години и не постари од 29 години (заклучно 22.05.2020) година кои се активни учесници во државното формално средно образование и високото додипломско образование ќе добијат картичка со 3.000 денари.
Здравствени работници ангажирани во справување со ковид-19 и кои се вработени во ЈЗУ, Клиника за инфективни болести, Институт за јавно здравје, центри за јавно здравје, Итна помош, инфективните одделенија и вработени во други одделенија ангажирани за тестирање, дијагностицирање и лекување на граѓани заболени од ковид-19 ќе добијат картичка со износ од 40 отсто од основната нето-плата.