Рама потврди дека данското претседателство со ЕУ добило овластување да ја покани Албанија да ја презентира својата преговарачка позиција во врска со последните поглавја
Албанија не запира – изјави албанскиот премиер Еди Рама по одлуката на амбасадорите на 27-те земји од Европската Унија да се отвори последното поглавјe од преговорите со Албанија, што ги вклучува земјоделството и кохезијата, пренесува албанскиот портал Газета експрес.
Рама потврди дека данското претседателство со ЕУ добило овластување да ја покани Албанија да ја презентира својата преговарачка позиција во врска со последните поглавја.
„Денеска, на 23 јули 2025 година, по континуираниот и динамичен напредок на Албанија на патот на преговорите за членство во Европската Унија, Комитетот на постојани претставници на земјите-членки на Европската Унија го овласти данското претседателство да ја покани Албанија да ја презентира својата преговарачка позиција за преговорите во врска со поглавјата што ја сочинуваат Групата поглавја 5 „Ресурси, земјоделство и кохезија“,
напиша Рама на Фејсбук.
Се огласи и претседателката на албанскиот парламент Елиса Спиропали, која рече дека Собранието ќе продолжи максимално да ја поддржува презентацијата на преговарачката позиција и напорите, продонесите и инвестициите за одржлив рурален развој, модернизацијата на земјоделството и социјалната и територијална кохезија на Албанија.
Се очекува шестата меѓувладина конференција да се одржи на почетокот на септември за да се означи последниот официјален чекор за отворање на сите поглавја со цел полноправно членство на Албанија во 2030 година.
Рама досега неколку пати изјави дека Албанија има за цел да ги заврши преговорите до 2027 година и полноправно членство во ЕУ до 2030 година.
Албанија во 2009 година поднесе барање за влез во Европската Унија, а првата меѓувладина конференција за пристапни преговори се одржа во 2022 година. Досега напредокот на Албанија на патот кон ЕУ беше поврзан со напредокот на Северна Македонија.
Одлуката Албанија да почне преговори за членство во ЕУ по кластери во септември 2024 година ја донесе Комитетот на постојани претставници на владите на земјите членки на ЕУ (Корепер), со што земјата се одвои во патот кон ЕУ од С Македонија.