Покрај демократите, само двајца републиканци од Претставничкиот дом гласаа против законот за намалување на финансирањето
Претставничкиот дом на САД, во кој мнозинството го имаат републиканците, го усвои предлог-законот на администрацијата на претседателот Доналд Трамп за намалување на средствата за јавни медиуми и помош во странство во висина од девет милијарди долари и го испрати на потпис во Белата куќа, пренесоа светските медиуми.
Законот за намалување на средствата ја доби поддршката од 216 члена на Претставничкиот дом, додека 213 гласаа „против“. Инаку, покрај демократите, кои без исклучок гласаа „против“, им се придружија само двајца републиканци, односно Брајан Фицпатрик од Пенсилванија и претставникот од сојузната држава Охајо, Мајк Тарнер.
Предлог-законот оваа недела стигна од Сенатот, каде што претрпе измени во делот за намалување на средствата на глобалната програма за превенција од ХИВ-СИДА во висина од 400 милиони долари кои не се дел од законското решение, односно остануваат во сила.
„Преземаме е еден мал чекор кон намалување на расипничкото трошење, но еден огромен скок кон фискалната рационалност“,
ја цитира „Гардијан“ изјавата на републиканскиот претставник од Флорида, Арон Бин.
Лидерот на малцинството во Претставничкиот дом, Хаким Џефрис, пак, возврати дека намалувањето на средствата ја поткопува способност на САД да ги заштити луѓето во земјата и да ја проектира својата „мека моќ“ низ целиот свет. Според него, со намалувањето на средствата ќе биде намален пристапот до информации од јавен интерес или за итни случаи на Американците во руралните средини.
Инаку, гласањето за законот за финансирање беше одложувано со часови поради несогласувањата на републиканците околу други закони и повиците од некои членови на партијата за поголема транспарентност на владата во врска со починатиот осуден сексуален престапник Џефри Епштајн.
Изјаснувањето за конкретниот предлог-законот беше второто гласање со тесен исход во Претставничкиот дом поврзано со барањата на Трамп, што од неговата администрација но и самиот тој ги опишуваа како враќање на средствата претходно одобрени од демократите и дел од републиканците во Конгресот.
Имено, во јуни четворица републиканци им се придружија на демократите за да гласаат против претходната верзија на пакетот за повлекување на средствата, кој беше усвоен со 214 наспроти 212 гласа.
Републиканците во Претставничкиот дом почувствуваа дополнителен притисок да ја усвојат верзијата законот што помина во Сенатот, бидејќи во спротивно администрацијата на Трамп ќе беше принудена да ги потроши парите доколку Конгресот не ги одобри кратењата до денеска.
Инаку, намалувањето од 9 милијарди долари е мал дел од федералниот буџет на земјата кој изнесува 6,8 билиони долари.
Републиканците велат дека средствата за странска помош претходно оделе на програми што ги сметаат за расипнички, како и дека една милијарда долари од финансирањето на јавните медиуми ги поддржуваат радиостаниците и телевизијата Пи-би-ес (PBS), за кои тврдат дека се против конзервативните гледишта.
Пред гласањето во Претставничкиот дом, пакетот за кратење на финансирањето беше одобрен со тесна разлика од 51 глас наспроти 48 во Сенатот. Сите демократи гласаа против законот.
Демократските пратеници велат дека администрацијата блокирала повеќе од 425 милијарди долари трошоци одобрени од Конгресот, откако започна вториот мандат на Трамп во јануари.