„Удираме директно во срцето на руската воена машинерија, таргетирајќи ги банкарскиот, енергетскиот и воено-индустрискиот сектор, воведувајќи ново динамично ограничување на цените на нафтата. Притисокот е голем. Ќе продолжи сè додека Путин не ја заврши оваа војна“, порача шефицата на ЕК, Урсула фон дер Лајен
Европската Унија го одобри 18-иот пакет санкции против Русија од почетокот на руската инвазија на Украина, во кој се таргетирани финансискиот и енергетскиот сектор, вклучено ограничување на цените за извоз на руска нафта.
„ЕУ штотуку го одобри еден од своите најсилни пакети санкции против Русија досега. Пораката е јасна – Европа нема да се откаже од својата поддршка за Украина и ќе продолжи да го зголемува притисокот сè додека Русија не ја заврши својата агресија“,
изјави високата преставничка за надворешна политика на Европа, Каја Калас.
Усвојувањето на санкциите го поздрави и претседателката на Европската комисија, Урсула фон дер Лајен.
„Удираме директно во срцето на руската воена машинерија, таргетирајќи ги банкарскиот, енергетскиот и воено-индустрискиот сектор, воведувајќи ново динамично ограничување на цените на нафтата. Притисокот е голем. Ќе продолжи сè додека Путин не ја заврши оваа војна“,
изјави шефицата на ЕК.
I welcome the agreement on our 18th sanctions package against Russia.
— Ursula von der Leyen (@vonderleyen) July 18, 2025
We are striking at the heart of Russia's war machine.
Targeting its banking, energy and military-industrial sectors and including a new dynamic oil price cap.
The pressure is on.
It will stay on until…
Деталите за ограничувањето на цената на нафтата не се веднаш откриени, но како што објави Ројтерс, пакетот санкции ќе го намали ограничувањето на цената на руската сурова нафта во Г7 на 47,6 долари за барел. Мерката е дел од иницијативата на Г7 насочена кон ограничување на приходите на Русија од извозот на нафта низ светот.
Санкциите, исто така, вклучуваат забрана за трансакции со гасоводите „Северен поток“ и таргетирање на повеќе бродови кои се дел од таканаречената „флота во сенка“ на Русија – бродови за кои се верува дека ги заобиколуваат санкциите на ЕУ со тоа што превезуваат главно руска нафта.