Случајот во полиција го пријавила ќерката на починатиот, 20-годишната Е.М.
Педесетгодишниот припадник на Армијата, А. М., кој во петокот беше смртно застрелан на влезот на селото Батинци, е убиен бидејќи ќерка му одбила да се омажи за осомничениот напаѓач Џ. М. – информираат од Министерството за внатрешни работи (МВР). Случајот во полиција го пријавила ќерката на починатиот – Е. М. (20).
„Според пријавеното, тие околу 8:30 часот биле на Клиниката за неврологија при Комплексот клиники ‘Мајка Тереза’ во Скопје, при што Џ. М. се обидел телефонски да контактира со неа, но таа одбила, затоа што во претходниот период Џ. М. ѝ се заканувал затоа што не сакала да се омажи за него“,
се наведува во полицискиот билтен на МВР.
Таткото и ќерката потоа со возило се упатиле кон својот дом во скопско Батинци, но на влезот на селото патот им го попречило возило од кое излегот Џ. М. и пукал кон А. М.
Починатиот припадник на АРМ за време на инцидентот не бил на должност. Тој им подлегнал на повредите кратко откако со прострелни рани во градниот кош бил пренесен во болницата „Свети Наум Охридски“ во Скопје.
Јавното обвинителство во петокот информира дека напаѓачот е идентификуван и дека по него се трага.