Осврнувајќи се на вчерашните предлози за кандидати за градоначалници од СДСМ, Мицкоски им посака успешна и достоинствена кампања, но и сигурен пораз на следните локални избори
Премиерот Христијан Мицкоски денеска потврди дека утре ќе оствари првична средба со партијата ЗНАМ, со фокус на претстојните локални избори и можноста за заеднички кандидати за градоначалници.
„Утре ќе имаме првична средба со ЗНАМ, да слушнеме, да видиме кои се очекувањата, ние ќе ги испратиме нашите пораки“,
изјави Мицкоски додавајќи дека во недела е предвиден Извршен комитет на ВМРО-ДПМНЕ, каде ќе се дискутираат деталите од разговорот.
Премиерот нагласи дека партијата има „систематизиран гантограм на активности“ за претстојниот период.
Мицкоски потврди дека консултациите со сегашните коалициски партнери продолжуваат, а потоа ќе следуваат и разговори со други политички партии кои се заинтересирани да се приклучат на ВМРО-ДПМНЕ за локалните избори.
„Јавноста ќе биде информирана штом ќе има повеќе конкретни информации околу коалициите“,
рече тој.
Осврнувајќи се на вчерашните предлози за кандидати за градоначалници од СДСМ, Мицкоски им посака успешна и достоинствена кампања, но и сигурен пораз на следните локални избори.
Запрашан дали проширувањето на коалицијата, за кое претходно зборуваше, се однесува на партии како ДОМ и Партијата на пензионерите, кои ја напуштија коалицијата со СДСМ, и дали имало разговори за нивно приклучување кон власта, премиерот остана воздржан од коментар.
„Да бидеме внимателни и трпеливи, сè што има ново, навремено ќе биде јавноста информирана“, кусо одговори Мицкоски.