Основното јавно обвинителство Скопје претходно не најде ништо спорно со ТОЕФЛ-сертификатот за познавање на англиски јазик на директорот на Агенцијата за национална безбедност (АНБ), Бојан Христовски
СДСМ бара нова истрага од Обвинителството во врска со ТОЕФЛ-сертификатот за познавање на англиски јазик на директорот на АНБ Бојан Христовски, имајќи ги предвид новите сомнежи кои излегоа во јавноста по истражувањето на БИРН.
„Последното истражување на БИРН, од увид во документацијата открива нови сомнителни и скандалозни детали за валидноста на ТОЕФЛ сертификатот по кои мора да постапат институциите. Прво. За јазичниот сертификат Христовски полагал од дома, а во интервјуто за македонски медиум Христовски рече дека полагал преку јазичното студио ‘Јулија’ во Пловдив. Дали Христовски излажал за да го покрие скандалот? Понатаму, трите дела од испитот, читање, слушање и пишување, Христовски ги полагал на ист датум, на 22 март 2022 година а делот говорење го полагал пет дена порано. Тоа е спротивно на правилата на ЕТS, каде тестот трае околу два часа за сите четири дела, а паузите се забранети“,
изјави денеска на прес-конференција, портпаролката на СДСМ Богданка Кузеска.
Како што посочи таа, на самиот документ стоело дека резултатите од сертификатот важат две години односно, до март 2024 година, а Христовски бил именуван за директор во октомври 2024 година, што значи седум месеци по истекот на важењето.
„Очигледно и приложениот сертификат од страна на Христовски е со помината важност. Овде има и еден клучен факт: кодот на тест-центарот наведен во сертификатот на Христовски не е од Пловдив, како што тврдеше тој, туку од Софија. Истиот тој центар нема никаква врска со студиото ‘Јулија’ на кое се повикува директорот на АНБ. Дополнително, документот што го покажува неговиот резултат е верзија што може самиот кандидат да ја испечати, без никаква гаранција за автентичност од ETS“,
изјави Кузеска.
Таа побара Обвинителството да отвори нова, независна истрага за случајот Христовски,
„Јавно обвинителство за гонење организиран криминал и корупција да отвори предмет бидејќи по Закон е надлежна. Обвинителството да побара од ETS – единствената овластена институција – да ги открие официјалните податоци за полагањето на Бојан Христовски. Јавноста да ја дознае целата вистина, а сите инволвираи во овој скандал мора да одговараат. Одговорност мора да има“,
порача портпаролката на СДСМ.
Директорот на Агенцијата за национална безбедност (АНБ) Бојан Христовски, на двапати го полагал испитот по ТОЕФЛ за англиски јазик, а кодот на центарот за тестирање каде што полагал не е во Пловдив, каде што е регистрирано јазичното студио „Јулија“, покажа истражувањето на БИРН.
Основното јавно обвинителство Скопје претходно не најде ништо спорно со ТОЕФЛ-сертификатот за познавање на англиски јазик на директорот на Агенцијата за национална безбедност (АНБ), Бојан Христовски.
Обвинителството заклучило дека Христовски не направил лажна исправа со намера да ја употреби како вистинска и не употребил преправена исправа како вистинска, ниту пак како доказ во правниот сообраќај употребил исправа, книга или спис за кои знае дека се невистинити.