Синдикатот реагира на неодамна објавениот оглас за нови вработувања, оценувајќи дека „не одговара на реалните, итни и суштински потреби на компанијата“. Наместо тоа, бараат поништување на огласот и пополнување на работните позиции преку прераспределување на веќе вработениот кадар во М-НАВ
Струковиот синдикат на контролори на летање на Северна Македонија (ССКЛМ) му постави ултиматум на раководството на М-НАВ со кој бара поништување на последниот оглас за нови вработувања и итна реализација на неисполнетите точки од минатогодишната Спогодба. Доколку барањата не бидат исполнети до крајот на овој месец, Синдикатот најавува реактивирање на штрајкот почнувајќи од 10 јули.
Според ССКЛМ, состојбата во М-НАВ е драстично влошена како резултат на сериозно нарушени меѓучовечки односи, блокирани процеси за јавни набавки, неуспешна транзиција на нови технички системи, прекршување на одредби од Колективниот договор, тајни и неосновани измени во систематизацијата, како и непочитување на точките од спогодбата помеѓу М-НАВ и ССКЛ од 13 јули 2023 година. Токму таа спогодба, како што наведуваат во известувањето до УО на М-НАВ, беше клучна за ставање во мирување на тогашната одлука за штрајк.
Синдикатот реагира на неодамна објавениот оглас за нови вработувања оценувајќи дека не одговара на реалните, итни и суштински потреби на компанијата. Наместо тоа, бараат поништување на огласот и пополнување на работните позиции преку прераспределување на веќе вработениот кадар во М-НАВ, преку интерен оглас, додавање работни задачи на недоволно ангажирани вработени, или преку одделни реорганизации и рационално прераспределување на постојниот кадар.
ССКЛМ нагласува дека, и покрај рекордниот пораст на авионски прелети, застарениот технички систем е во критична состојба и може да откаже во секој момент. Синдикатот посочува на недостиг од инженерски кадар, што резултира со недовршени проекти. Исто така, иако има недостиг од контролори на летање, раководството не успеало да стави во функција нов систем кој би можел да го подигне капацитетот на опслужени воздухоплови и до 50 проценти.
Дополнително, Синдикатот укажува на тоа дека ниту еден инфраструктурен проект не е реализиран, дека сѐ уште не е изработена функционалната анализа на компанијата која би ја ставила на стабилна основа, и дека повеќе од девет месеци нема ангажирана агенција за обезбедување, и покрај рекордното зголемување на авионскиот сообраќај.