Во однос на воените тензии на Блискиот Исток и нивното потенцијално влијание врз берзата на енергенси, Ристески посочи дека Владата ја следи ситуацијата на светско ниво
Комплетната анализа на Државниот пазарен инспекторат (ДПИ) за зголемувањето на цените на прехранбените производи ќе биде готова во текот на наредната недела, најави денеска заменик-министерот за економија и труд Марјан Ристески.
Во однос на тоа дали веќе работат на мерки за да се намалат цените на прехранбените производи во маркетите, Ристески вели дека Владата секогаш прави детални анализи пред да донесе одлуки и мерки и нагласи дека тоа ќе биде случај и овој пат.
„Ние ги следиме цените максимално преку Државниот пазарен инспекторат, правиме анализи и доколку заклучиме дека има потреба да се донесе некоја одлука и мерка, ќе го направиме во интерес на граѓаните за заштита на животниот стандард. Пред сѐ, на нас како влада ни е интерес граѓаните и нивниот животен стандард“,
изјави Ристески.
Според тековната анализа на ДПИ, Ристески рече дека е забележано мало зголемување на цените, а најмногу кај кафето и маслото, кои се берзански производи.
„Особено вратени се дел од цените на производите како што беше пред одлуката, којашто беше пред еден месец и повеќе. Има мало покачување на одредени цени, некои останале и на исто ниво. Но, имаме поголемо зголемување на цените на кафето и маслото, кои се берзански производи и зависат од светските берзи. Меѓутоа, сепак, за крајна одлука ќе биде известена јавноста, доколку ја има, а тоа ќе го покаже комплетната анализа, која ќе биде готова во текот на наредната недела“,
рече Ристески.
Во однос на воените тензии на Блискиот Исток и нивното потенцијално влијание врз берзата на енергенси, Ристески посочи дека Владата ја следи ситуацијата на светско ниво.
„Ја следиме не само ситуацијата на внатрешната економија, туку ги пратиме и светските случувања, она како што иде, така и ќе реагираме како Влада. Мораме да бидеме и претходно спремни и да имаме информации и да имаме состаноци на повеќе министерства и на Влада. Се прати ситуацијата доколку ескалира работата, која би предизвикала и одреден потрес и на светската економија, нормално е дека Владата ќе реагира со соодветни мерки“,
изјави Ристески.
Тој додаде дека Владата нема да чека и да дозволи да биде понесена од светската економска криза и ја нагласи подготвеноста за брза реакција.
Денеска академикот Таки Фити предупреди дека ескалација на воениот конфликт меѓу Иран и Израел носи сериозни инфлациски импликации за македонската економија, што може да доведе до зголемување на производствените трошоци на сите бизниси.
Во врска со зголемените цени на производите по укинувањето на ограничените маржи, Фити нагласи дека економската наука е против директните интервенции како замрзнувањето на цените бидејќи тие често се контрапродуктивни и проблемите се акумулираат. Тој се залага за индиректни мерки и посочи на улогата на Комисијата за заштита на конкуренцијата.
Вчера премиерот Христијан Мицкоски најави дека многу скоро ќе има предлог-решение за ублажување на растот на цените на прехранбените производи. Тој рече дека се консултираат со експертската јавност и оти следат што се случува со однесувањето на трговците, производителите, дистрибутерите и на трговците.
И министерот за економија и труд Бесар Дурмиши викендов најави дека не е исклучена можноста повторно да има воведување мерки доколку има енормно зголемување на цените.