Бојан Јовановски-Боки 13 и Катица Јанева заедно со своите адвокати денеска во Основниот кривичен суд во Скопје треба да започнат со давање на завршните зборови во случајот „Рекет“.
Боки е првообвинет за делата примање награда за противзаконито влијание и за перење пари, а Јанева се товари за злоупотреба на службената положба и овластувања.
По завршните зборови, ќе треба да се закаже уште едно рочиште за изрекување на пресудата.
На минатото рочиште на 26 мај своите завршни зборови ги кажа и обвинителката Вилма Русковска, која рече дека обвинителството успеало да ја докаже вината на двајцата обвинети преку исказите на сведоците, снимките што ги предал Орце Камчев и останатите материјали докази.
Судскиот процес пред првостепениот суд во Скопје започна на 3 декември лани. Со Боки и Јанева на обвинителна клупа тогаш седна и Зоран Милески-Кичеец за примање наградата за противзаконито влијание, но тој призна вина и веќе наредниот ден доби затворска казна од три години. Неговата пресуда сè уште не е правосилна бидејќи за тоа неа треба да се изјасни и Апелација до каде што тој заедно со својот адвокат има поднесено жалба за висината на казната.