Александар Пандов, директорот на Управата за извршување санкции под чија надлежност е судницата, вели дека таа е во одлична состојба и ги повика и останатите судии, особено од поголемите предмети со повеќе обвинети, рочиштата да ги одржуваат во овој објект
Во дигиталната судница во рамките на затворот „Идризово“ во Скопје денеска почнува судењето за случајот „Адитив“ кој се однесува на криминал во државната компанија „Електрани на Северна Македонија“ (ЕСМ), тежок 6,5 милиони евра.
Во предметот се обвинети 31 физичко и пет правни лица, меѓу кои и поранешни високи функционери од енергетскиот сектор.
Меѓу обвинетите во предметот се и ексдиректорот на ЕСМ, Васко Стефанов, како и неговиот претходник на функцијата, Васко Ковачевски, кој се наоѓа надвор од државата и по кого е распишана меѓународна потерница. Обвинет е и поранешниот директор на ТЕЦ „Неготино“, Небојша Стојановиќ, како и поранешните комерцијални директори на ЕСМ, Адријан Муча и Данчо Стојановски.
Според Обвинителството, обвинетите преку пререгистрација на фирми и договарање меѓу економски оператори местеле тендери за набавка на адитиви за јаглен за потребите на РЕК „Битола“ и РЕК „Осломеј“, со што одредени компании добиле договори и оствариле имотна корист од над 400 милиони денари или околу 6,8 милиони евра.
„Во период од месец април 2023 до месец август минатата година, дел од обвинетите во својство на службени лица создале група чија цел била вршење кривични дела злоупотреба на постапката за јавен повик, доделување на договор за јавна набавка или јавно-приватно партнерство, злоупотреба на службена положба и овластување и перење пари и други приноси од казниво дело. Во меѓувреме, со намера да прибават за себе или за друг имотна корист од поголеми размери или да предизвикаат штета од поголеми размери, дел од останатите обвинети станале припадници на оваа група. Тие, договарајќи се со други можни учесници заради изигрување на постапката за доделување на договори за јавна набавка, свесно ги повредиле прописите за постапката за јавен повик, доделување договор за јавна набавка или јавно-приватно партнерство“,
соопштија од Основното јавно обвинителство за гонење организиран криминал и корупција (ОЈО ГОКК) на 27 февруари кога беше поднесено обвинението.
Истрагата за случајот „Адитив“ беше отворена на 10 декември лани по опсежна акција на полицијата и Обвинителството за гонење организиран криминал и корупција.
Директорот на Управата за извршување санкции, Александсар Пандов, пред почетокот на главната расправа од судскиот процес во изјава за медиумите пред објектот на дигиталната судница ја поздрави одлуката на судијката Даниела Димовска, судењето за овој случај да се одвива во овој објект.
„Како што знаете, оваа судница е направена во 2020 година. Првото судење во неа е одржано дури после две години, односно во 2022 година и од тогаш до денес за жал оваа судница седи празна. Оваа судница е под Управата за извршување санкции, но ова е пред сè и над сè на Република Македонија. Не знам колку сте имале можност да ја видите судницата. Ова е буквално европска судница која заслужува многу почесто да биде користена. Оттука би сакал да ги повикам сите останати судии, особено од поголемите случаи, каде има поголем број на обвинети да ја користат во иднина“,
рече Пандов.
Според него, иако подолго не била користена, судницата е во одлична состојба, а некои недостатоци кои биле детектирани пред судењето, во смисла на неофунционален компјутер, монитор и сл. биле веднаш санирани.
„Сметам дека во иднина и посакувам и верувам во тоа дека оваа судница ќе биде многу почесто користена“,
рече Пандов.
Инаку судницата првпат беше користена во судски процес за трговија со дрога во декември 2022 година.
Како што соопштија по тој повод тогаш од Основниот кривичен суд Скопје, дигиталната судница е изградена според светските безбедносни стандарди со посебни влезови за судечкиот совет, странките, јавноста , како и спровод на притворените лица со целосно почитување на нивните права загарантирани со Устав. Ова, како што беше наведено тогаш, освен што овозможува поголема непристрасност во постапувањето на судот, ќе допринесе и во економичноста на постапката со намалување на трошоците за транспорт и обезбедување на притворени лица, од притворското одделени до зградата на Кривичниот суд.