Русија сака Украина да биде неутрална, да се укинат некои западни санкции, да се реши прашањето за замрзнатите руски средства на Запад и да се заштити народот што зборува на руски јазик во Украина, изјавиле трите извори за Ројтерс
Условите на рускиот претседател Владимир Путин за прекин на војната во Украина вклучуваат барање, западните лидери писмено да се обврзат дека ќе го запрат ширењето на НАТО кон исток и ќе укинат дел од санкциите врз Русија, велат за Ројтерс три руски извори запознаени со преговорите.
Американскиот претседател Доналд Трамп постојано вели дека сака да го прекине најсмртоносниот конфликт во Европа од Втората светска војна, а во последните денови покажува растечка фрустрација кон Путин. Тој вчера предупреди дека рускиот лидер си игра со оган затоа што одбива да учествува во преговорите за примирје со Киев додека неговите сили остваруваат напредок на бојното поле.
Откако разговараше со Трамп повеќе од два часа минатата недела, Путин рече дека се согласил да соработува со Украина на меморандум што ќе ги утврди принципите на мировниот договор, вклучително и временска рамка за прекин на огнот.
Русија вели дека во моментов ја изготвува својата верзија на меморандумот и не може да процени колку време ќе трае.
Киев и европските влади ја обвинуваат Москва за одложување додека нејзините трупи напредуваат во источна Украина.
„Путин е подготвен да склучи мир, но не по секоја цена“,
рекол руски извор запознаен со размислувањето на високите функционери на Кремљ, кој се согласил да зборува за Ројтерс под услов да остане анонимен.
Три руски извори изјавиле дека Путин сака писмено ветување од големите западни сили дека НАТО-алијансата предводена од САД нема да се шири кон исток, што би значело исклучување на Украина, Грузија, Молдавија и други поранешни советски републики од членство.
Русија сака Украина да биде неутрална, да се укинат некои западни санкции, да се реши прашањето за замрзнатите руски средства на Запад и да се заштити народот што зборува на руски јазик во Украина, изјавиле трите извори.
Кремљ не одговорил на барањето на Ројтерс за коментар.
Путин и руските претставници постојано повторуваат дека секој мировен договор мора да ги реши „основните причини“ на конфликтот, што за Русија првенствено значи прашање на проширување на НАТО.
Киев вели дека на Русија не треба да ѝ се даде право на вето врз кандидатурата на Украина за членство во НАТО и вели дека ѝ се потребни силни безбедносни гаранции од Западот за да се одврати каков било иден руски напад.
Администрацијата на украинскиот претседател Володимир Зеленски не одговори на барањето за коментар.
НАТО, исто така, во минатото изјави дека нема да ја промени својата политика на отворени врати само затоа што Москва го бара тоа. Портпаролот на 32-члената алијанса не одговори на прашањата на Ројтерс.
Русија моментално контролира нешто помалку од една петтина од територијата на Украина. Иако рускиот напредок се забрза во текот на изминатата година, војната се покажува скапа и за Русија и за Украина во однос на жртвите и трошоците за одбрана.