Во објава на социјалните мрежи во која информира за оставката, Рамадани му заблагодари на премиерот за укажаната можност, на матичната Алијанса за Албанците на укажаната доверба, а на институциите и партнерите за поддршката и професионализмот
Националниот координатор за имплементација на нови технологии, Блерант Рамадани, кој е дел од крилото на Алијанса за Албанците предводено од Арбен Таравари, информира дека поднесува оставка од функцијата.
Во објава на социјалните мрежи во која информира за оставката, Рамадани му заблагодари на премиерот Христијан Мицкоски за укажаната можност, на матичната Алијанса за Албанците на укажаната доверба, а на институциите, соработниците и партнерите за поддршката и професионализмот.
„Денес донесов одлука да се повлечам од функцијата национален координатор за имплементација на нови технологии – одговорност која ја извршував со посветеност, интегритет и визија за развојот на нашата земја. Оставката не претставува крај, туку чекор на размислување и подготовка за нови предизвици. Останувам посветен да придонесувам таму каде што мојот ангажман може да донесе вредност“,
пишува Рамадани во објава на Фејсбук.
Претходно денеска Собранието ги констатира оставките на министерот за здравство Арбен Таравари на заменик-министрите за земјоделство, шумарство и водостопанство Фљакрон Беџети и за одбрана Елфет Исмаили од АА.