Од ВЛЕН велат дека мнозинството од структурите на Алијанса за Албанците го делат истото мислење со Сулејмани и дека масовно има оставки, а тоа, како што додаваат, е бидејќи гласачите на партијата не ја прифаќаат коалицијата со Ахмети како резултат на „пазарењата на Таравари“
Коалицијата ВЛЕН денеска излезе со реакција по оставката на пратеникот Салим Сулејмани од Алијанса за Албанците и ја оцени како доказ на незадоволство од одлуката на Арбен Таравари да коалицира со ДУИ и Али Ахмети.
Според ВЛЕН, постапката на Таравари не само што е осудена од нивна страна како поранешни коалициски партнери, туку предизвикува разочарување и кај неговите блиски соработници.
Тие велат дека оставката на Сулејмани е највисок морален чин кој покажува дека Албанците ниту се купуваат ниту се продаваат за позиции.
Од ВЛЕН велат дека мнозинството од структурите на Алијанса за Албанците го делат истото мислење со Сулејмани и дека масовно има оставки, а тоа, како што додаваат, е бидејќи гласачите на партијата не ја прифаќаат коалицијата со Ахмети како резултат на „пазарењата на Таравари“.
Тие го критикуваат Таравари за, како што велат, лошо партиско водство и управување тврдејќи дека за помалку од две години нанел повеќе штета на партијата отколку која било друга спротивна страна.
Од ВЛЕН додаваат дека со континуираните оставки, Таравари ќе остане „сам во скутот на Али Ахмети“.
„Ние, како ВЛЕН, од самиот почеток сме на мислење дека во Алијансата за Албанците има чесни луѓе со морална одговорност кон електоратот, а овие наши изјави денес ги потврди пратеникот Сулејмани, како и голем број други функционери, активисти и гласачи, кои на никаков начин не се поврзуваат со злото“,
се додава во соопштението од ВЛЕН.
Тие порачуваат дека албанскиот граѓанин, без разлика дали е функционер, активист или гласач не е алатка во рацете на Таравари што треба да се користи за пазарење на ниско ниво.
ВЛЕН најавува „политички земјотрес“ од кој ќе треперат Ахмети и Таравари и им посакува „успешна коалиција“ и додава дека тие се позиционираат како страна која му служи на народот, а оти водачите на тендерите ќе завршат во историјата.
Пратеникот од Алијанса за Албанците (АА), Салим Сулејмани, вчера на Фејсбук објави дека поднесува оставка од сите партиски и од функцијата пратеник во Собранието на Република Северна Македонија.
Тој напиша дека се кандидирал за пратеник поради длабокото чувство на одговорност и желбата за вистинска промена во животот на граѓаните, а коалицијата ВЛЕН се создала како резултат на длабокото разочарување што Албанците го доживеале од ДУИ.
Инаку, по заминувањето на Сулејмани, на негово место треба да дојде Валбона Адили-Емини, која според кандидатската листа на ВЛЕН од последните локални избори е следна по него. Таа е педијатар по професија и е кадар на Движењето Беса. Па така, се очекува ВЛЕН да има вкупно десет пратеници.
Партијата на Сулејмани, Алијанса за Албанците, до скоро беше дел од коалицијата ВЛЕН која, пак, е дел од владината коалиција. Но, лидерот Арбен Таравари објави дека излегува и од ВЛЕН и од Владата поднесувајќи си оставка од функцијата министер за здравство. Овој чекор Таравари го објасни посочувајќи дека ВЛЕН станала само декор во Владата и не ги застапувала доволно Албанците. Во пресрет на локалните избори најави можна соработка со опозициската ДУИ.
Но, негови сопартијци не се согласуваат со ваквиот чекор. Ексминистерот од редовите на АА, Азир Алиу, изминатите денови објави дека останува во ВЛЕН и во Владата. Тој заедно со актуелниот вицепремиер за добро владеење Арбен Фетаи, исто така кадар на АА, беа во Косово на средба со косовскиот премиер Албин Курти.