Според информациите на МИА, по изјавата на Таравари дека заминуваат во опозиција, премиерот Христијан Мицкоски нема да се сретне со него. Во меѓувреме, владејачката ВМРО-ДПМНЕ, чиј претседател е Мицкоски, вечерва ќе одржи седница на Извршниот комитет на партијата
По синоќешното официјално соопштение на Арбен Таравари дека неговото крило на Алијанса за Албанците (АА) излегува од владината коалиција, од Илинденска број 2 денеска во изјава за МИА информираат дека нема да има реконструкција на Владата, туку само смена на министрите.
Алијанса за Албанците на Таравари во актуелната Влада има две министерски места, односно ресорот здравство што го води самиот Таравари и вицепремиерската позиција за добро владеење на која во моментов се наоѓа Арбен Фетаи. Во Собранието, пак, ова крило на Алијанса има пет пратеници.
Она што е неизвесно дали ќе има потреба да се прави смена на двете позиции што во Владата ги има Алијанса на Албанците или само во Министерството за здравство бидејќи нема официјална информација дали вицепремиерот Арбен Фетаи останува во власта или заминува заедно со Таравари.
Денеска на прашање на „360 степени“ околу ваквите сомнежи, Фетаи остана со неодреден одговор велејќи оти сега не може да коментира.
Според информациите на МИА, по изјавата на Таравари дека заминуваат во опозиција, премиерот Христијан Мицкоски нема да се сретне со него. Во меѓувреме, владејачката ВМРО-ДПМНЕ, чиј претседател е Мицкоски, вечерва ќе одржи седница на Извршниот комитет на партијата.
Освен што соопшти дека вечерва ќе заседава Извршниот комитет на ВМРО-ДПМНЕ, Валентин Манасиевски, член на Централниот комитет на ВМРО-ДПМНЕ, во името на партијата демантира дека досега било разговарано за каква било размена на министерства или ресори во Владата или за тоа кој би дошол на местото на Таравари и би го преземал Министерството за здравство.
Од Владата за МИА не ги потврдуваат ниту информациите за можна рокада на ресорите меѓу ВМРО-ДПМНЕ и коалицијата ВЛЕН, како што синоќа во интервју за „360 степени“ на МРТ 1 кажа Биљал Касами, лидер на движењето Беса кое е дел од владејачката коалиција.
Касами рече дека со новата реалност, може да има некакви рокади во Владата, а на дополнително прашање дали тоа значи реконструкција тој одговори оти е можно да има некои комбинаторики.
Тој тврди и дека наскоро, можеби уште во текот на оваа недела, ќе се зголеми бројот на пратеници кои ќе мигрираат во владејачкото мнозинство. Прашан дали овие пратеници доаѓаат од структурата на Арбен Таравари или се дел од „Европски фронт“, тој вели – од двата табора.
Засега е неизвесно како точно ќе се одвива смената на министрите – дали тие ќе поднесат оставки или Владата ќе ги разреши.
„Можам да гарантирам дека веќе сме во сериозни преговори со повеќе пратеници и од албанската опозиција и од другите членови на другите заедници кои се дел од сегашниот ‘Европски фронт’“,
изјави Касами.
Минатата недела „360 степени“ контактираше со лидерите на партиите на турската етничка заедница во Македонија, од кои две се членки на опозицискиот „Европски фронт“ предводен од ДУИ, а кои се дел од шпекулациите за можните трансфери.
Пратеникот Сали Мурати од Движењето на Турците на Македонија за правда и демократија на прес-конференција во Собранието отфрли таква можност, додека во изјава за „360 степени“ пратеникот и лидер на Демократската партија на Турците, Бејџан Иљас, не беше толку категоричен.
Пратеникот Мурати, прашан дали можеби размислуваат да преминат во ВЛЕН, рече дека тоа се дезинформации и оти некогаш и опозицијата заслужува внимание.
За разлика од Мурати, кој вели дека останува во „Европскиот фронт“, претседателот на ДПТ, Бејџан Иљас, не ја исклучува можноста за преминување во владејачкото мнозинство доколку се отвори потреба, но вели оти засега немаат добиено официјална покана.
Во изјава за „360 степени“, Иљас вели дека по излегувањето на Арбен Таравари од ВЛЕН, несомнено е оти се очекуваат промени и додаде дека сè додека немаат покана продолжуваат со „Европски фронт“.
Отворено останува и прашањето колку од петте пратеници на Алијанса за Албанците на Таравари ќе останат лојални до него со оглед на тоа што на синоќешниот партиски огранок на АА го немаше Салим Сулејмани за кој лидерот рече дека бил отсутен поради семејни проблеми.