Посочи дека можат легално да затвораат институти, досега затвориле 13, а уште толку се под силен мониторинг
Јавна тајна е дека луѓе се стекнуваат со лажни и незаслужени дипломи. Но, тоа тешко се докажува, оти и едната и другата страна е учесник и двете страни треба да одговараат, оти тоа е криминално дело. Ова денеска го рече министерката за образование и наука, Весна Јаневска коментирајќи го својот осврт на панелот во рамки на Самитот „Македонија 2025“, во делот дека постојат случаи на нелегално стекнување со факултетски дипломи.
„Луѓето отворено зборуваат кога се наоѓаат во приватен круг, дека се стекнале со такви дипломи. Но, бидејќи е јавна тајна, имаме инструменти со кои можеме да провериме каков е квалитетот на образованието во одредени високообразовни институции. И ние тоа го правиме“,
рече таа.
Според неа, има недоречености во Законот, нешта што во минатото не се направени, на пример, евалуации од страна на Агенцијата за квалитет на високото образование.
„За да можеме да го затвориме процесот, мора да направиме измени во законите за високо образование, закон за Агенцијата за квалитет во високото образование, закон за научно-истражувачка дејност, закон за иновации. Она што ни дозволува Законот за наука, тоа го спроведуваме“,
вели министерката.
Посочи дека можат легално да затвораат институти, досега затвориле 13, а уште толку се под силен мониторинг.
„Затворивме и една медицинска струка, сега ќе затвораме и втора. Сè уште го докомплетираме процесот, зашто не би сакала процедурата да не биде како што треба. Ќе го докомплетираме и ќе продолжиме и во иднина во тој правец“,
кажа Јаневска.
Според неа, кога ги почнале проверките и затворањето, одреден број институти поднеле барање за затворање оти, како што додаде, самите беа свесни дека не ги исполнуваат условите и ги затвориле.
Министерката на панел-дискусија Самитот „Македонија 2025“ рече и дека има приватни универзитети што постојат како трговски претпријатија и кои со години наназад „штанцаат“ дипломи.
„Не сум против отворање приватни школи, универзитети и слично, но секој мора да го почитува законот и уште поважно, тие да не се отвораат исклучиво за бизнис цели, туку со мисија да помогнат во квалитетот на образованието“,
кажа Јаневска.