Арбен Таравари избра да ја игра улогата на тројански коњ, тој цело време правеше притисок одвнатре за да нема резултати, вели градоначалникот на Тетово и еден од лидерите на ВЛЕН, Биљал Касами, во интервју за „360 степени“ на МРТ1. На прашањето како го коментира ставот на Таравари, кој тврди дека дури 70% од етничките Албанци се незадоволни од позицијата на ВЛЕН во владата, Касами го обвинува токму Таравари како извор на проблеми во коалицијата. Пред доаѓањето на Таравари во коалицијата не се зборуваше за поделби, туку за соединување, вели тој.
Касами: Таравари беше тој што одвнатре правеше тензии и проблеми. Наместо да зборуваме за политички прашања, требаше да зборуваме за поделба на позиции и министерства во владата.
360°: Тоа нели е природно во таква структура?
Касами: Природно е, но не и да доминира. Ние сега го немаме тој проблем. Откако се расчисти со Таравари, го нема тој проблем. А дека оваа влада нема сериозни поместувања во делот на правата на Албанците, не е вистина.
Како примери ги посочува изградбата на Коридорот 8, за кој се потврдило дека нема пренамена на парите и прекин на инвестициите, како што тврделе од ДУИ, како и поддршката на инфраструктурни проекти за општините.
За застојот во носење закон за соодветна и правична застапеност, кој треба да го замени т.н. „балансер“, според Касами, виновен е Таравари.
Касами: Ние веќе имаме политички договор со премиерот дека ќе биде решено со закон. Долго се зборува (за тој закон) затоа што ние наместо да бидеме фокусирани што побрзо тој закон да се промовира во јавноста, се занимававме со тоа како да го задоволиме Арбен Таравари во владата.
360°: Готов ли е тој закон? Зошто не е на ЕНЕР или во владина процедура ако е готов?
Касами: Мислам дека многу брзо, ако не оваа, во следните две недели, тој ќе се промовира. Во оваа ситуација не беше проблем договорот во владата. Овие работи во ВЛЕН имаат подолга историја, од почетокот на годината, така што минимум 4-5 месеци наместо да се занимаваме со политички теми, ние се занимававме што да му дадеме плус на Арбен Таравари.