Планот предвидува населението да биде преместено од север кон југ од енклавата, според соопштението на владата. Целта на Израел е да го победи Хамас и да обезбеди ослободување на заложниците што сè уште ги држи, додадоа од израелската влада
Израелскиот кабинет за безбедност одобри план Израел да го заземе Појасот Газа и да го контролира израелската војска на неодредено време, соопштија владини извори. Израелскиот премиер Бенјамин Нетанјаху изјави дека вооружените сили ќе преминат од извршување напади, на окупирање на Појасот Газа и трајно останување таму.
Планот предвидува населението да биде преместено од север кон југ од енклавата, според соопштението на владата. Целта на Израел е да го победи Хамас и да обезбеди ослободување на заложниците што сè уште ги држи, додадоа од израелската влада. На Хамас, исто така, не треба да му се дозволи да го попречува доставувањето хуманитарна помош, се вели во соопштението.
Нетанјаху рече дека сè уште го поддржува планот на американскиот претседател Доналд Трамп за доброволно иселување на жителите на Газа и дека тој се дискутира со неколку земји.
Планот на Трамп, според кој САД би го „презеле“ и „поседувале“ Појасот Газа, предизвика широки меѓународни критики. Израелскиот министер за одбрана Израел Кац минатиот месец изјави дека израелските трупи ќе одржуваат трајна контрола врз сите заземени области во Појасот Газа.
Војската би останала во безбедносните зони и би дејствувала како тампон-зона помеѓу непријателот и израелските заедници привремено или трајно, рече тој. Војската повеќе нема да ги евакуира областите, додаде Кац. Доколку Хамас не ги ослободи заложниците, операцијата би се проширила.
Кац претходно изјави дека израелската војска ќе заземе големи области од Појасот Газа за да создаде безбедносни зони под израелска контрола.