Со барањето за оставка на Љутков, според владејачката партија, СДСМ уште еднаш го покажува политичкиот очај и загубената доверба кај граѓаните. Додаваат оти во изминатите години партијата го довела овој сектор до раб на пропаст поради, како што обвинија од ВМРО-ДПМНЕ, нејзината неспособност, отсуство на стратегија и посветеност
СДСМ нема ниту морално ниту политичко право да зборува за културата и културното наследство бидејќи токму тие ја оставија културата во целосен распад. Вака реагираат од владејачката ВМРО-ДПМНЕ откако претходно денеска социјалдемократите побараа оставка од министерот за култура и туризам Зоран Љутков поради, како што рекоа, хаосот што го направил во ресорот со кој раководи.
„Тоа што ние го затекнавме не е само хаос – туку системски распад, каде културното наследство беше оставено на милост и немилост на времето. Бараат оставка од министерот Љутков? Зошто? Затоа што за првпат после години се отвораат реални прашања за системска реформа во културата? Затоа што зборува за модели кои се користат во цел свет – за заштита, реставрација и промоција на културни добра? Ставањето на културното наследство во контекст на туризмот преку јавно приватно партнерство, отворање на сувенирниците кои токму тие ги затворија, кафетерии и други пропратни содржини не е продажба на истото туку негова промоција. И да, културното наследство не е трговска роба – ама за СДС токму тоа и беше!“,
велат од ВМРО-ДПМНЕ.
Со барањето за оставка на Љутков, според владејачката партија, СДСМ уште еднаш го покажува политичкиот очај и загубената доверба кај граѓаните. Додаваат оти во изминатите години партијата го довела овој сектор до раб на пропаст поради, како што обвинија од ВМРО-ДПМНЕ, нејзината неспособност, отсуство на стратегија и посветеност.
Од владејачката партија додаваат дека веќе се преземаат конкретни чекори за исплата на мартовските плати на културните работници.
„Проблемите се резултат токму на нефункционалниот систем што го остави СДС – но тоа, очигледно, удобно го заборавате особено кога ви треба политички спин. Ете тоа покажува што навистина значеше културата за вас – ништо! Тие што денес зборуваат за ‘распродажба’ се истите што дозволија објекти од непроценливо културно значење да пропаѓаат додека се занимаваа со партиски тендери и лични привилегии“,
се додава во соопштението на ВМРО-ДПМНЕ.
Опозицискиот СДСМ побара оставка од министерот за култура и туризам Зоран Љутков поради, како што рекоа, хаосот што го направил во ресорот со кој раководи, пред сè во однос на неисплатените мартовски плати за работниците во културата, но и за изјавите на министерот за приватизација на културното наследство.