Триесет дена би можеле да му дадат шанса на мирот, вели Зеленски по објавата на Путин за велигденско примирје кое би траело 30 часа
Ако Русија сега одеднаш е подготвена вистински да се вклучи во формат на целосна и безусловна тишина, Украина ќе постапи соодветно – пресликувајќи ги постапките на Русија. Молк како одговор на молкот, одбранбени удари како одговор на нападите, порача украинскиот претседател Володимир Зеленски како одговор на објавата на Путин за примирје.
„Ако навистина дојде до целосен прекин на огнот, Украина предлага негово продолжување и по Велигден на 20 април. Триесет дена би можеле да му дадат шанса на мирот“,
напиша Зеленски на платформата Х.
Досега, според извештаите од терен, руските јуришни операции продолжуваат на фронтот, а руската артилерија не стивнува, додава Зеленски.
„Затоа, нема доверба во зборовите кои доаѓаат од Москва. Добро знаеме како Москва манипулира и подготвени сме на се. Украинските одбранбени сили ќе дејствуваат рационално – одговарајќи на таков начин. Секој руски удар ќе биде проследен со соодветен одговор“,
соопшти Зеленски.
Претходно рускиот престедател Владимир Путин најави велигденско примирје и прекин на огнот со Украина во следните денови. Како што соопшти Кремљ, Путин ова го кажал на денешната средба со началникот на Генералштабот Валери Герасимов.
„Руската страна, водејќи се од хуманитарни причини, денеска од 18:00 часот (по московско време) до 00:00 часот меѓу недела и понеделник, прогласува велигденско примирје. Наредувам да се прекинат сите воени дејствија за овој период. Очекувам и другата страна да го следи примерот,“
рече Путин.
Во првичната реакција Зеленски потегот го оцени како нова манипулација на Москва, бидејќи и во текот на попладнето како што рече, имало руски напади врз Украина со дронови.