СДСМ уште на почетокот алармираше дека оваа бесмислица ниту ќе помогне да се намалат цените ниту некој реално ќе има корист од неа, но Владата не слушаше. Наместо да ги прифати мерките на СДСМ со кои реално ќе се намалеа цените на основните производи, Владата реши да им замачкува очи на граѓаните, порачуваат од опозициската партија
Откако мерката на Владата, со која маркетите задолжително треба да ги објавуваат цените на своите веб-страници, наиде на голем потсмев кога беше најавена, сега таа се докажува и како целосно нефункционална, велат од СДСМ.
„На граѓаните им е потребен околу еден час само за да споредат еден производ во сите маркети. Доколку треба да направат споредба на сите производи што редовно ги купуваат, веројатно би требало да земат ден одмор од работа. СДСМ уште на почетокот алармираше дека оваа бесмислица ниту ќе помогне да се намалат цените ниту некој реално ќе има корист од неа, но Владата не слушаше“,
се наведува во соопштението од СДСМ.
Наместо да ги прифати мерките на СДСМ, со кои реално ќе се намалеа цените на основните производи, Владата реши да им замачкува очи на граѓаните, порачуваат од опозициската партија.
„Резултатот, месеци подоцна, е целосно неупотреблива алатка, осудена на пропаст – и цени кои се вивнати во небо. Десетици милиони евра е државниот грабеж што им е направен на граѓаните како резултат на лошите политики на Владата и работењето во интерес на трговците“,
посочуваат од СДСМ.
Заменик-министерот за економија и труд Марјан Ристески денес потенцира дека нема одложување на мерката со која трговците се обврзани на веб-страниците да ги објавуваат цените на производите.
„Како што почна мерката вчера да се применува, така и пазарниот инспекторат има вонредни контроли. Засилени контроли ќе има по велигденските празници. Казните за оние што нема да ја почитуваат оваа транспарентност преку нивните веб-страници се движи од 500 до 10 илјади евра“,
кажа Ристески.