Јапонија, која е близок сојузник на САД, како и голем број други земји, се соочува со американски царини од 25 отсто за автомобили, челик и алуминиум. На Јапонија ѝ се заканува реципрочен дополнителен данок од 24 отсто за целиот нејзин извоз во САД, но, како што неодамна одлучи американскиот претседател, овие тарифи се одложени за 90 дена
Американскиот претседател Доналд Трамп соопшти дека е постигнат „голем напредок“ во трговските преговори со Јапонија, што вчера се одржаа во Вашингтон.
Според извештаите на светските агенции, Трамп направил неочекуван потег со тоа што лично се појавил на средбата меѓу американската и јапонската делегација, а за ова тој потоа извести и преку објава на неговата социјална мрежа Трут соушл (Truth Social).
Имено, јапонската делегација, предводена од Риосеи Аказава, министер за економска ревитализација на земјата, во Вашингтон требаше да се сретне само со американскиот секретар за финансии Скот Бесент и со претставникот за трговија Џејмисен Грир, но на состанокот ненајавено се приклучил и претседателот Трамп.
По него, тој напиша дека морал да учествува на состанокот затоа што Јапонија дошла да преговара за тарифите, трошоците за воена поддршка и за трговска правда.
„Чест ми е што присуствував на состанокот и можам само да кажам дека веднаш беше забележан голем напредок“,
вели Трамп.
Јапонија, која е близок сојузник на САД, како и голем број други земји, се соочува со американски царини од 25 отсто за автомобили, челик и алуминиум. На Јапонија ѝ се заканува реципрочен дополнителен данок од 24 отсто за целиот нејзин извоз во САД, но, како што неодамна одлучи американскиот претседател, овие тарифи се одложени за 90 дена.
Пред американско-јапонските преговори, јапонскиот производител на автомобили „Хонда“ објави дека ќе го префрла производството на својот хибриден модел „хонда сивик“ од Јапонија во САД.
По Јапонија, во наредните денови се очекува на преговори во Вашингтон нa истата тема да седнат и претставници од Јужна Кореја и од Индонезија.
Јапонска новинска агенција денеска ја пренесе изјавата на премиерот на земјата, Шигеру Ишиба, дека билатералните преговори со САД нема да бидат лесни, истовремено објавувајќи дека има намера да отпатува во Вашингтон на директни разговори со американскиот претседател Трамп околу прашањето за царините.
Ишиба рекол дека Јапонија и САД имаат различни мислења околу ова прашање и дека е подготвен да се сретне со Трамп во „најсоодветно време“.