Од МВР велат дела пријавените, како службени лица, пропуштиле да пријават кривично дело за кое дознале во вршењето на службената должност, а притоа не презеле никакви дејствија
За директор на ЈУ меѓуопштински центар за социјални работи – Македонски Брод и вработена како социјална работничка во установата поднесени се кривични пријави поради непријавување кривично дело или сторител.
Како што информираат од Министерството за внатрешни работи (МВР), двајцата пријавени, Р.С. (38) и К.В. (44), на 7 март годинава добиле телефонска пријава за полов напад и силување дете кое било доделено во згрижувачко семејство и не наполнило 15 години, извршено од лице од Македонски Брод.
Пријавените, додаваат од МВР, не презеле никакви службени дејствија по добиената пријава. Тие, како службени лица, свесно пропуштиле да пријават кривично дело за кое дознале во вршењето на службената должност, а притоа не презеле никакви дејствија согласно законот за социјала заштита и подзаконските акти, Закон за правда на децата, со што создале услов за повторна виктимизација на детето жртва на кривично дело.