Ажурирањето на цените трговците треба да го вршат на дневна основа, секој работен ден до 10:00 часот. За производите што се продаваат по промотивна или цена со попуст, трговецот е должен да ја означи и нивната редовна цена, процентот или износот на намалувањето на производот, како и времетраењето на промоцијата или попустот
Маркетите, аптеките и продавниците за техника и мебел од овој петок, 18 април, ќе мора да ги објавуваат цените на своите производи на официјалните веб-страници. Ваквата новина е резултат на измените на Законот за заштита на потрошувачи кои стапуваат во сила од петок.
По усвојувањето на законските измени во февруари годинава, Министерството за економија и труд во предвидениот рок од 45 дена изготви Правилник за начинот на објавување на цените и податоците што треба да бидат објавени од страна на мал, среден и голем трговец кој врши дејност трговија на мало.
Според насоките во Правилникот, трговците треба да ги објавуваат цените на своите производи на јасен и достапен начин, на посебен дел на веб-страницата. Ценовникот треба да биде достапен без претходна регистрација или дополнителна најава на интернет-страницата.
Трговците се должни да ја објават тековната цена по која се продава производот, единечната цена, промотивната или цената со попуст за секој одделен производ. За производите што се продаваат по промотивна или цена со попуст трговецот е должен да ја означи и нивната редовна цена, процентот или износот на намалувањето на производот, како и времетраењето на промоцијата или попустот.
Ажурирањето на цените трговците треба да го вршат на дневна основа, секој работен ден до 10:00 часот. Во случај на ненамерна техничка грешка во ажурирањето на цените, трговецот треба да ја коригира во рок од 24 часа.
Доколку маркетите не ја почитуваат ваквата одлука ќе се соочат со парични казни од 500 до 10 илјади евра, а во зависност од големината на маркетите, воведена е и поригорозна мерка затворање на маркетот од 15 дена