Членовите на македонскиот дел од тимот на почетокот на средбата изразиле благодарност до Бугарија за укажаната помош при згрижување на повредените во пожарот во Кочани
Денеска и вчера во Софија се одржала 35. средба на Заедничката мултидисциплинарна експертска комисија за историски и образовни прашања меѓу Северна Македонија и Бугарија.
Членовите на македонскиот дел од тимот на почетокот на средбата изразиле благодарност до Бугарија и тамошните институции за укажаната помош при згрижувањето и лекувањето на повредените во пожарот во Кочани. Благодарност упатиле и до граѓаните на Бугарија за искажаната емпатија и солидарност во овие моменти.
Во информацијата која ја сподели претседателот на македонскиот тим, Ванчо Ѓорѓиев, се наведува дека средбата поминала во работна и конструктивна атмосфера. Се дискутирало за предлог-препораките за македонските учебвици за седмо одделение, како и за евентуални чествувања – прашања кои беа предмет на разговор и на претходните две средби на заедничката историска комисија.
„По однос на овие теми двете страни низ една динамична дискусија ги соочија своите ставови, при што не беше постигнат напредок. Притоа беа усогласени ставовите по нацрт-записникот од 29. средба“,
се наведува во соопштението.
Претходната средба на зедничката историска комисија се одржа во февруари годинава во Скопје, а следната е закажана за в јуни, исто така, во Скопје.