Министерот за здравство, Венко Филипче, вели дека ситуацијата со коронавирусот е под контрола, но иако една битка е добиена, борбата не е завршена.
Тој на денешната прес-конференција по владината седница на која беа донесени нови одлуки за мерките против ковид-19, рече дека земјата се наоѓа на крстосница.
„Денеска се точно три месеци откако се дијагностицираше првата пациентка со коронавирус, која дојде од Италија. Сега по три месеци сме на една крстосница, дали постепено да го враќаме животот во нормала и граѓаните да се придржуваат до мерките за растојание и заштита или, пак, доколку мерките не се почитуваат, агонијата да продолжи и по неколку месеци повторно да воведуваме рестриктивни мерки“,
рече Филипче.
Според него, многу граѓани беа жртви и во ризик од оние граѓани кои не ги почитуваа мерките.
„Факт е дека вирусот нема да замине и ќе мораме да научиме да живееме со него, но ќе мораме да се заштитиме. Задолжително носење маска, одржување растојание и често миење на рацете. За жал, добар дел од граѓаните не се придржуваат до мерките, па и не веруваат дека вирусот постои. Ние со мерките продолжуваме понатаму и тоа е клучот со кој го враќаме животот во нормала. Целосно сме подготвени да се носиме со ситуацијата“,
рече Филипче.