Според неа, американските трговски мерки претставуваат тежок удар за светската економија. Фон дер Лајен истакна дека Европската Унија подготвува контрамерки доколку не успеат преговорите
Претседателката на Европската комисија, Урсула фон дер Лајен, во видеообраќање на повеќе јазици – англиски, германски и француски, ги коментираше новите царини што ги воведе американскиот претседател Доналд Трамп.
Според неа, американските трговски мерки претставуваат тежок удар за светската економија. Фон дер Лајен истакна дека Европската Унија подготвува контрамерки доколку не успеат преговорите.
„Веќе го финализираме првиот пакет контрамерки како одговор на царините за челик. Дополнително, подготвуваме нови мерки за да ги заштитиме нашите интереси и компании, доколку преговорите не дадат резултат“,
изјави Фон дер Лајен во Самарканд, Узбекистан, каде што учествуваше на самитот за партнерство меѓу ЕУ и Централна Азија.
Таа предупреди дека последиците од американските царини ќе бидат огромни.
The universal tariffs announced by the US are a major blow to businesses and consumers worldwide.
— Ursula von der Leyen (@vonderleyen) April 3, 2025
Europe is prepared to respond.
We'll always protect our interests and values.
We're also ready to engage.
And to go from confrontation to negotiation ↓ https://t.co/WbXqsN4ZX7
„Глобалната економија ќе претрпи сериозни штети, неизвесноста ќе се зголеми, а тоа ќе предизвика нов бран протекционизам. Последиците ќе бидат страшни за милиони луѓе низ светот, особено за најранливите економии, кои сега ќе бидат погодени од највисоките американски царини. Граѓаните ќе се соочат со повисоки цени на храната, лековите и транспортот. Инфлацијата ќе расте“,
додаде Фон дер Лајен.
Претседателката на ЕК истакна дека сите компании, без разлика дали се големи или мали, ќе бидат погодени од првиот ден, поради нарушување на синџирите на снабдување, зголемена неизвесност и дополнителна бирократија.
Фон дер Лајен ја потенцираше важноста на заедничкиот европски одговор.
„Ако нападнете еден од нас, сте нè нападнале сите нас. Нашето единство е нашата сила“,
нагласи таа, додавајќи дека Европа ќе застане зад сите што ќе бидат директно погодени од мерките.
I would like to speak to my fellow Europeans ↓ pic.twitter.com/h00KZ1McsY
— Ursula von der Leyen (@vonderleyen) April 3, 2025
Фон дер Лајен потсети дека Трамп претходно најави воведување на минимална царина од 10 отсто на повеќето увозни производи во САД, а за Европската Унија таа ќе биде повисока – 20 проценти. Ова дополнително ја влошува глобалната трговска војна, зголемувајќи го ризикот од инфлација и забавување на економскиот раст во САД и во светот.