Во владиното соопштение се додава дека на проблемот со платите Владата гледа како на проблем на тешката и сложена социоекономска состојба во државата, а не на, како што велат, персоналните политички амбиции на дел од раководството на синдикатот
Проблемот на работниците може да се реши системски и со вистински пристап – велат од Владата во писмено соопштение по денешниот собир на Сојузот на синдикати на Македонија (ССМ) пред Собранието од каде што синдикалците побараа минималната плата да изнесува не помалку од 500 евра.
Од Владата го оценија за погубен пристапот на Синдикатот за споредба на платите на пратениците со оние на работниците, додавајќи дека на овој начин се докажува партиската заднина на дел од раководството на ССМ.
„Кога прават компарација на плати, да ги потсетиме дека ние како влада бевме против кога платите на функционерите се зголемуваа, а синдикатот тогаш молчеше за своите партиски миленици од СДСМ и ДУИ, како што молчеа со години додека СДСМ беше на власт, а државата ја уништуваа, ограбуваа и продаваа. Сегашниот пристап на овие луѓе е погубен, играат рулет со нешто кое за нив е обид за политичка кариера и злоупотреба, а за нас е прашање на живот – животот на работниците. Со сила и со ваква очигледна партиска мотивираност и со малициозен и неразумен пристап ништо нема да постигнат. Зошто молчеа седум години?“,
велат од Владата.
Во владиното соопштение се додава дека на проблемот со платите Владата гледа како на проблем на тешката и сложена социоекономска состојба во државата, а не на, како што велат, персоналните политички амбиции на дел од раководството на синдикатот.
„За нас не е проблем и да ги спуштиме платите, но на работниците тоа нема да им го реши проблемот. Притоа, да потсетиме дека ова е прва влада која донесе одлука за замрзнување на платите на функционерите. Истовремено, за премиер да има иста плата со претседател на синдикат треба претседателот на синдикатот да победи на избори на првите наредни парламентарни избори, а пред тоа да има договор да се најде на листите на СДСМ. Тогаш, ако го изгласа народот, ќе видиме дали така лесно ќе се откажува од платата. Штом е така подготвен коцкарски да се откаже од својата плата, лошо зборува за него и за блеферската природа на неговата личност. Впрочем, само човек што има многу пари со леснотија може да се откаже од половина плата“,
додаваат од Владата.
Претходно денеска Сојузот на синдикати на Македонија (ССМ) одржа собир пред парламентот од каде побара минималната плата да изнесува не помалку од 500 евра и да се зголемат сите други плати за 100 евра.